पुणे : विरुद्ध दिशेने आलेल्या डंपरच्या धडकेत दुचाकीस्वार तरुणाचा मृत्यू झाला. ही घटना येरवडा भागातील शास्त्रीनगर ते गुंजन चित्रपटगृह रस्त्यावर रविवारी घडली. याप्रकरणी डंपरचालकाविरुद्ध गुन्हा दाखल करण्यात आला.
तन्वीर आलमयार खान (वय ३१, रा. वाघोली, नगर रस्ता) असे मृत्युमुखी पडलेल्या दुचाकीस्वाराचे नाव आहे. याप्रकरणी डंपरचालक अमिल रामसिरीठ सिंग (वय ४६, रा. शास्त्रीनगर, येरवडा) याच्याविरुद्ध गुन्हा दाखल करण्यात आला आहे. याबाबत आत्तार खान (वय ३४, रा. वाघोली, नगर रस्ता) यांनी येरवडा पोलिस ठाण्यात फिर्याद दिली आहे. पोलिसांनी दिलेल्या माहितीनुसार, डंपरचालक सिंग रविवारी (दि. १) येरवड्यातील शास्त्रीनगर चौकातून विरुद्ध दिशेने गुंजन चित्रपटगृहाकडे निघाला होता. सकाळी साडेदहाच्या सुमारास नगर रस्त्याने निघालेल्या दुचाकीस्वार तन्वीर याला विरुद्ध दिशेने आलेल्या डंपरने धडक दिली. अपघातात दुचाकीस्वार तन्वीर याचा जागीच मृत्यू झाला. पोलिस उपनिरीक्षक केकाण तपास करत आहेत.