ग्राहकांची पसंती असलेल्या शहरातील भागांमध्ये सध्या घरांच्या किमती ४५०० ते ५२०० रुपये प्रति स्क्वेअर फूट इतक्या आहेत. औंध, बाणेर, बालेवाडी, हिंजवडी या भागात घरे घेण्याकडे ग्राहकांचा कल जास्त असतो. मात्र, येथील दर ५५०० रुपयांच्या घरात गेल्याने त्याचा खरेदीवर दूरगामी परिणाम होण्याची शक्यता वर्तवली जात आहे. मात्र, सध्याची परिस्थिती पाहता प्रोजेक्टचा प्रकार, ठिकाण याप्रमाणे किमतीमध्ये तडजोड करण्याची तयारीही बांधकाम व्यावसायिकांकडून दाखवली जात आहे.
पुण्यात घरांच्या किमती कमी होण्याचे प्रमाण इतर शहरांच्या तुलनेत कमी आहे. बंगळुरूनंतर आजही रिअल इस्टेट क्षेत्रातील गुंतवणुकीमध्ये पुणे अग्रस्थानी आहे. पुण्यातील वातावरण, वाहतुकीच्या सुविधा, इतर शहरांशी असलेला ‘कनेक्ट’ यामुळे बाहेरगावाहून आलेले लोकही पुण्यात घर घेण्याला पसंती देतात, असे रिअल इस्टेट तज्ज्ञांचे म्हणणे आहे. इंडस्ट्रिअल हब, आयटी हब यामुळे शिक्षण, नोकरीसाठी पुण्यात येणा-यांचे प्रमाण लक्षणीय आहे. त्यामुळेच घरांच्या मागणीमध्ये सातत्याने वाढ होत आहे.
उपनगरांचा बराचसा भाग महानगरपालिकेमध्ये समाविष्ट झाल्याने तेथील गृह प्रकल्पांमध्येही मोठ्या प्रमाणात वाढ झाली आहे. वाघोली, च-होली, शिवणे, उत्तमनगर, कोल्हेवाडी, आंबेगाव, न-हे अशा अनेक ठिकाणी घरांमध्ये गुंतवणूक करण्याचे प्रमाण वाढले आहे. स्वत:च्या मालकीच्या दुचाकी, चारचाकींमध्ये वाढ झाल्याने उपनगरांमधून कामाच्या अथवा शिक्षणाच्या ठिकाणापर्यंत पोहोचणेही शक्य झाले आहे.
कोरोना काळानंतर पुन्हा आर्थिक उलाढाल वाढावी, ग्राहकांना गुंतवणुकीस चालना मिळावी, यासाठी बांधकाम व्यावसायिकांनी नवीन योजना बाजारपेठेत दाखल केल्या आहेत. ग्राहकांनी घर खरेदी करताना एकूण रकमेच्या ३० टक्के रक्कम भरावी आणि उर्वरित रक्कम घराचा ताबा मिळाल्यानंतर भरावी, अशा प्रकारच्या योजना जाहीर केल्या आहेत. ग्राहकही टाऊनशिप प्रोजेक्टना पसंती देत आहेत.