दारूच्या नशेत चालकाने गाडी थेट बस स्टॉपमध्ये चढवली; सुदैवाने अनर्थ टळला

सुदैवाने रात्रीचा वेळ असल्यामुळे बस थांब्यावर कोणी प्रवासी नव्हते

किरण शिंदे

Pune Crime: शहरातील वाहतूक शिस्तीला धक्का देणारी आणि नागरिकांच्या सुरक्षिततेबाबत प्रश्नचिन्ह निर्माण करणारी घटना नुकतीच समोर आली आहे. पुणे-सातारा रस्त्यावरील पंचमी चौकाजवळील भापकर पेट्रोल पंपाजवळ ३० मे रोजी रात्री ११ वाजता दारूच्या नशेत असलेल्या चालकाने गाडी थेट बस स्टॉपमध्ये घातली.

मिळालेल्या माहितीनुसार, गणेश गोरख जेवे असे या गाडी चालवणाऱ्या इसमाचे नाव असून, तो MH12 KT 4764 या क्रमांकाची चारचाकी चालवत होता. नशेत असलेला जेवे याचे अचानक वाहनावरील नियंत्रण सुटले आणि त्याने बस स्टॉपमध्ये गाडी घातली. सुदैवाने रात्रीचा वेळ असल्यामुळे बस थांब्यावर कोणी प्रवासी नव्हते, अन्यथा मोठा अनर्थ घडला असता.

या घटनेचा व्हिडीओ सध्या सोशल मीडियावर मोठ्या प्रमाणावर व्हायरल झाला असून, नागरिकांमध्ये या बाबत तीव्र प्रतिक्रिया उमटत आहेत. माहिती मिळाल्यानंतर पार्वती पोलिसांनी घटनास्थळी धाव घेत चालकाला ताब्यात घेतले असून, त्याच्याविरोधात 'ड्रिंक अँड ड्राइव्ह' अंतर्गत गुन्हा दाखल करण्यात आला आहे.

यासोबतच, संबंधित गाडी पोलिसांनी ताब्यात घेतली असून, वाहन चालकाचा परवाना रद्द करण्यासाठी अहवाल प्रादेशिक परिवहन कार्यालयाकडे पाठवण्यात आला आहे.