पुणे : गरीब व सर्वसामान्य नागरिकांचे घराचे स्वप्न साकारण्यासाठी पुणेम्हाडाने पुढाकार घेत ऐन दिवाळीच्या मुहूर्तावर तब्बल 4 हजार 253 घरांची सोडत जाहीर केली आहे. याशिवाय तब्बल 935 लोकांना आपली दिवळी नवीन व हक्काच्या घरामध्ये करता यावी यासाठी येत्या शुक्रवारी नवीन घरांची सोडत व चावी वाटपाचा कार्यक्रम उपमुख्यमंत्री तथा पालक मंत्री अजित पवार यांच्या हस्ते पिंपरी वाघिरे म्हाडा काॅलनी येथे होणार असल्याची माहिती पुणे गृहनिर्माण व क्षेत्रविकास मंडळाचे मुख्य कार्यकारी अधिकारी नितीन माने-पाटील यांनी पत्रकार परिषदेत दिली. यावेळी म्हाडाचे इस्टेट मॅनेजर विजय ठाकूर उपस्थित होते.
कोरोनामुळे सर्वसामान्य नागरिकांचे आर्थिक परिस्थिती खूपच बिघडली आहे. अशा स्थितीत गरीब व आर्थिक दुर्बल घटकातील लोकांचे घराचे स्वप्न पूर्ण करण्यासाठी पुणे म्हाडाने पुढाकार घेतला आहे. ऐन कोरोना काळात जानेवारी 2020 मध्ये म्हाडाच्या वतीने इतिहासातील सर्वात मोठी म्हणजे तब्बल 5 हजार 657 घरांची सोडत काढून मोठा दिलासा दिला होता. उपमुख्यमंत्री अजित पवार यांच्या हस्ते काढण्यात आलेल्या लाॅटरीला प्रचंड चांगला प्रतिसाद मिळाला. त्यानंतर म्हाडाच्या इतिहासात प्रथमच गुढीपाडव्याच्या मुहूर्तावर पुणे, पिंपरी-चिंचवडसह विभागातील सांगली, सोलापूर, सातारा आणि कोल्हापूर जिल्ह्यात तब्बल अडीच हजार घरांची सोडत म्हाडाने काढली होती. त्यानंतर आता दिवाळीचा मुहूर्त साधत पुणे म्हाडा तब्बल 4 हजार 253 घरांची सोडत काढत नवा इतिहास निर्माण केला आहे. यामध्ये तब्बल 2 हजार 945 सदनिका शहरातील खाजगी आणि नामांकित बिल्डरांच्या मोठ्या प्रोजेक्टमध्ये आहेत.
अशी असेल घरांची सोडत म्हाडा गृहनिर्माण योजना : 59 सदनिका खाजगी बिल्डर 20 टक्क्यांतील घरे : 2945म्हाडा प्रथम येणाऱ्यास प्राधान्य : 2886
सोडतीचे वेळापत्रक ऑनलाईन अर्ज दाखल करणे : 29 ऑक्टोबर ऑनलाईन अर्ज दाखल करणे अंतिम तारीख : 29 नोव्हेंबर ऑनलाईन पेमेंट स्वीकृती : 1 डिसेंबर ऑनलाईन लाॅटरी : 16 डिसेंबर
जास्तीत जास्त लोकांनी अर्ज करून लाभ घ्यावा शासनाने केलेल्या कायद्याची कडक अंमलबजावणी करत सर्व मोठ्या बिल्डरांकडून 20 टक्क्यांतील घरे सर्वसामान्य नागरिकांना परवडणा-या दरामध्ये उपलब्ध करून देणे हाच म्हाडाचा मुख्य उद्देश आहे. आता म्हाडाने साडेचार हजार घरांची सोडत काढली असून, जास्तीत जास्त लोकांनी अर्ज करून योजनेचा लाभ घ्यावा.- नितीन माने-पाटील, मुख्य अधिकारी, पुणे विभाग म्हाडा