विचारांमधील अंतराने फूट, पण चिंता नको, सत्ता पुन्हा येईल! शरद पवारांचा समर्थकांना विश्वास

राज्याची, देशाची स्थिती चिंताजनक असून अशा वेळी सर्वांना बरोबर घेत काम करण्याची आपली जबाबदारी आहे

पुणे: मूलभूत विचारांमध्ये अंतर पडले म्हणून फूट पडली आहे, पण चिंता करू नका, विचारांबरोबर राहा, जनतेशी बांधिलकी ठेवा, सत्ता आपोआप येईल, अशा शब्दांमध्ये राष्ट्रवादी काँग्रेस (शरद पवार) पक्षाचे अध्यक्ष शरद पवार यांनी पक्षाच्या वर्धापन दिनी जमलेल्या समर्थकांना विश्वास दिला. पक्षातून बाहेर गेलेल्या नेत्यांपैकी कोणाचेही थेट नाव घेणे त्यांनी टाळले.

बालगंधर्व रंगमंदिरात मंगळवारी (दि.१०) झालेल्या या कार्यक्रमाला पक्षाच्या राष्ट्रीय कार्याध्यक्ष खासदार सुप्रिया सुळे तसेच पक्षाचे सर्व खासदार, आमदार, माजी राज्यपाल श्रीनिवास पाटील, प्रदेशाध्यक्ष जयंत पाटील, माजी मंत्री विजयसिंह मोहिते पाटील, अनिल देशमुख, जितेंद्र आव्हाड, हर्षवर्धन पाटील व्यासपीठावर उपस्थित होते. पक्षाचे शहराध्यक्ष प्रशांत जगताप यांनी सर्वांचे स्वागत केले. स्थानिक पदाधिकाऱ्यांच्या हस्ते पवार यांच्यासह सर्वांचा सत्कार करण्यात आला.
अर्ध्या तासाच्या भाषणात पवार यांनी पक्षातून बाहेर पडलेल्यांपैकी एकाचेही नाव घेतले नाही. ते म्हणाले, पक्षस्थापनेला २६ वर्षे झाली. जनतेने काम करण्याची संधी दिली. सर्वसामान्यांमधूनही राज्यकर्ते तयार करता येतात, हे पक्षाने दाखवून दिले. इतकेच नाही तर आर. आर. आबा व अन्य अनेकांनी राज्याच्या सामाजिक, शैक्षणिक तसेच आर्थिक जीवनावर परिणाम करतील, असे अनेक चांगले निर्णय घेतले. यातून पक्षाला प्रतिष्ठा मिळाली, पक्ष पुढे गेला.

प्रदेशाध्यक्ष जयंत पाटील यांनी प्रास्तविक केले. त्यांच्या हस्ते राष्ट्रवादी या अंकाचे प्रकाशन झाले. पवार यांना आर. के. लक्ष्मण यांच्या कॉमन मॅन बरोबर असलेले त्यांचे तैलचित्र भेट दिले.

फुट पडली मात्र मी चिंता करत नाही,आपण एकसंध राहिलो, जनतेच्या कामाशी बांधिलकी ठेवली तर सत्ता आपोआप येईल. राज्याची, देशाची स्थिती चिंताजनक आहे. अशा वेळी सर्वांना बरोबर घेत काम करण्याची आपली जबाबदारी आहे. त्यासाठी कर्तृत्ववान चेहऱ्यांना संधी देऊ. यातून नव्या नेतृत्वाची फळी उभी राहील आणि पुन्हा सत्ता मिळेल. -शरद पवार