ठरले! महादेव बाबर NCPमध्ये करणार प्रवेश; DCM अजित पवार राहणार उपस्थित, पुण्यात ताकद वाढणार

NCP Ajit Pawar Group Pune News: उपमुख्यमंत्री अजित पवार यांच्या प्रमुख उपस्थितीत महादेव बाबर राष्ट्रवादी काँग्रेसमध्ये प्रवेश करणार असल्याचे म्हटले जात आहे.

NCP Ajit Pawar Group Pune News: आगामी महानगरपालिका आणि स्थानिक स्वराज्य संस्थांच्या निवडणुकांच्या पार्श्वभूमीवर राज्यातील राजकीय घडामोडींना वेग येताना पाहायला मिळत आहे. या वर्षातच महापालिका आणि जिल्हा परिषदांच्या निवडणुका होणार आहेत. याबाबत सर्व पक्षांनी तयारी सुरू केली आहे. यातच ठाकरे गटाला मोठे खिंडार पडत असून, शेकडो पदाधिकारी, कार्यकर्ते, नेते, माजी नगरसेवक शिवसेना शिंदे गट आणि भाजपात प्रवेश करत आहेत. यातच पुण्यातून एक मोठी घडामोड समोर येत आहे. महादेव बाबरराष्ट्रवादी काँग्रेसमध्ये प्रवेश करणार आहेत. 

राज्यात ऑक्टोंबरपासून स्थानिक स्वराज्य संस्थांच्या निवडणुका होणार आहेत. महानगरपालिका आणि जिल्हा परिषदांच्या निवडणुका वेगवेगळ्या होणार आहेत. याबाबत निवडणूक आयोगाकडून लवकरच वेळापत्रक येऊ शकते, असे म्हटले जात आहे. राज्यात स्थानिक स्वराज्य संस्थांच्या निवडणुका चार टप्प्यांमध्ये होणार आहेत. ऑक्टोबर महिन्याच्या पहिल्या आठवड्यापासूनच मतदानाला सुरुवात होणार असल्याची माहिती समोर आली आहे. याबाबत आता निवडणूक आयोग तयारी करत आहे.

अजित पवारांच्या उपस्थितीत महादेव बाबरराष्ट्रवादी काँग्रेसमध्ये प्रवेश करणार 

मिळालेल्या माहितीनुसार, हडपसर विधानसभा मतदारसंघाचे माजी आमदार महादेव बाबर उद्या करणार राष्ट्रवादी काँग्रेसमध्ये प्रवेश करणार आहेत. उपमुख्यमंत्री अजित पवारांच्या उपस्थितीत हा पक्षप्रवेश होणार आहे. मुंबईत उद्या राष्ट्रवादीच्या पक्ष कार्यालयात जाहीर प्रवेशाचा कार्यक्रम होणार आहे. यामुळे पुणे महापालिका निवडणुकीसाठी राष्ट्रवादीची ताकद वाढणार असल्याचे बोलले जात आहे. विधानसभा निवडणुकीत तिकीट न मिळाल्यामुळे उद्धव ठाकरेंच्या शिवसेनेला बाबर यांनी जय महाराष्ट्र केला होता. 

दरम्यान, पुण्याच्या हडपसर विधानसभेत महाविकास आघाडी कडून प्रशांत जगताप यांना उमेदवारी देण्यात आली. या मतदारसंघात ठाकरे गटाकडून महादेव बाबर इच्छुक होते. हडपसरची जागा शरद पवार गटाकडे गेल्याने महादेव बाबर यांनी नाराजी व्यक्त केली होती.