‘पुणे ग्रँड टूर’पुरतेच सुशोभीकरण; बाणेरमधील शोभेची झाडे देखभाली अभावी सुकली 

स्पर्धा संपल्यानंतर या कामांकडे पूर्णतः दुर्लक्ष करण्यात आल्याने नागरिकांमध्ये तीव्र नाराजी व्यक्त होत आहे.

बाणेर : जानेवारी महिन्यात झालेल्या जागतिक दर्जाच्या ‘पुणे ग्रँड चॅलेंज टूर’ सायकल स्पर्धेच्या पार्श्वभूमीवर पुणे महापालिकेने विद्यापीठ चौक ते पाषाण-सूस रस्त्यापर्यंतच्या मार्गावर विकासकामांना मोठी गती दिली होती. स्पर्धेच्या मार्गावर डांबरीकरण, रस्त्यांचे सुशोभीकरण, झाडांच्या फांद्यांची छाटणी तसेच खड्डेमुक्तीची कामे युद्धपातळीवर करण्यात आली होती. महामार्गालगत लावण्यात आलेली शोभेची झाडे देखभालीअभावी आता सुकू लागली आहेत. स्पर्धा संपल्यानंतर या कामांकडे पूर्णतः दुर्लक्ष करण्यात आल्याने नागरिकांमध्ये तीव्र नाराजी व्यक्त होत आहे.

‘ग्रँड टूर’च्या निमित्ताने बाणेर परिसरातील महामार्गालगत मोठ्या प्रमाणावर शोभेची झाडे लावण्यात आली होती. मात्र, स्पर्धा संपल्यानंतर या झाडांची कोणतीही देखभाल न झाल्याने लाखो रुपयांचा निधी खर्च करून लावलेली ही झाडे सुकून गेली आहेत. झाडे जगवण्यासाठी आवश्यक असलेला नियमित पाणीपुरवठा, खत व्यवस्थापन आणि देखरेख न केल्यामुळे अनेक शोभेची झाडे कोमेजली असून काही ठिकाणी पूर्णतः सुकली आहेत. बाणेरसारख्या वेगाने विकसित होत असलेल्या परिसरात हरित क्षेत्र जपणे अत्यंत आवश्यक असताना, केवळ कार्यक्रमापुरते रस्त्यांचे सौंदर्य वाढवण्यासाठी झाडे लावून त्यानंतर त्याकडे दुर्लक्ष होणे चिंताजनक असल्याचे मत स्थानिक नागरिक आणि पर्यावरणप्रेमींनी व्यक्त केले आहे.

सुशोभीकरणासाठी पुणे महापालिकेने लाखो रुपये खर्च केले असताना योग्य नियोजन आणि देखभाल न केल्यामुळे हा खर्च वाया गेला असल्याचा आरोपही होत आहे. झाडे लावणे स्वागतार्ह आहे, मात्र त्यांचे संवर्धन आणि जतन करणे ही पालिकेची जबाबदारी आहे. सुशोभीकरणाचे उपक्रम सांभाळता येत नसतील, तर केवळ दिखाऊपणासाठी लाखो रुपये खर्च करून, असे उपक्रम राबवू नयेत, अशी स्पष्ट भूमिका नागरिकांकडून व्यक्त होत आहे. या प्रकरणी पुणे महापालिकेने तातडीने दखल घेऊन उर्वरित झाडांची योग्य देखभाल करावी, अशी मागणी जोर धरत आहे.