सोपानकाका चरणी...अश्व धावले रिंगणी..! सोमेश्वरनगर येथे पार पडला संत सोपानकाका पालखी सोहळ्याचा रिंगण सोहळा

- सोमेश्वरनगर येथील मु. सा. काकडे महाविद्यालयाच्या प्रांगणात हजारो वारकऱ्यांच्या उपस्थितील डोळ्यांचे पारणे फेडणारे पहिला अश्व रिंगण सोहळा पार पडला.

- महेश जगताप

सोमेश्वरनगर : सोपानकाका चरणी....! अश्व धावले रिंगणी..! श्री संत सोपानदेव पालखी सोहळ्यातील पाहिला अश्व रिंगण सोहळा सोमेश्वरनगर येथे पार पडला. सोमेश्वर कारखान्यावर विसावला.

सोमेश्वरनगर येथील मु. सा. काकडे महाविद्यालयाच्या प्रांगणात हजारो वारकऱ्यांच्या उपस्थितील डोळ्यांचे पारणे फेडणारे पहिला अश्व रिंगण सोहळा पार पडला. निंबुत येथून सोहळा न्याहरीसाठी निंबुत छपरी येथे विसावला. याठिकाणी ग्रामस्थांनी पालखीचे स्वागत केले. वाघळवाडी येथे पालखी अंबामाता मंदिर या ठिकाणी विसाव्यासाठी ठेवण्यात आली. ज्ञानोबा-तुकोबांचा जयघोष करीत गावकऱ्यांनी रस्त्याच्या दुतर्फा रांगोळी काढून, नीरा-बारामती रस्त्यावर स्वागत कमानी उभारल्या होत्या. सरपंच ॲड. हेमंत गायकवाड, उपसरपंच तुषार संकुडे, गणेश जाधव, अविनाश सावंत, अजिंक्य सावंत, बबलू सकुंडे, ग्रामविकास अधिकारी संजयकुमार भोसले उपस्थित होते. दुपारी चार वाजता पालखी रिंगणासाठी मु.सा. काकडे महाविद्यालयात आली. पहिले अश्वरिंगण पाहण्यासाठी हजारो वारकऱ्यांनी आणि सोमेश्वर परिसरातील नागरिकांनी गर्दी केली होती. अश्वाने रिंगण पूर्ण करताच भक्तिमय वातावरणात विठुनामाचा गजर करण्यात आला.

प्रथम सोपानकाकांच्या पादुकांचे रिंगण पूर्ण झाले. त्यानंतर मानाच्या अश्वाने दोनवेळा रिंगण पूर्ण करीत उपस्थितांच्या डोळ्यांचे पारणे फेडले. गोल रिंगण पूर्ण होताच वीणेकरी तसेच तुळशीवृंदावन डोक्यावर घेऊन महिलांनी तसेच विणेकरी, टाळकरी, झेंडेकरी व वडगाव निंबाळकर पोलिसांनी रिंगण पूर्ण केले. पालखी सोहळ्यात जवळपास दीड लाख वारकरी सहभागी झाले आहेत. अशी माहिती सोहळा प्रमुख त्रिगुणमहाराज गोसावी यांनी दिली.

सायंकाळी सहा वाजता पालखी सोहळा मुक्कामासाठी सोमेश्वर कारखान्याच्या छत्रपती शिवाजी महाराज प्रांगणात विसावला. सोहळा प्रमुख त्रिभुवन महाराज गोसावी यांचा कारखान्याच्या वतीने सन्मान करण्यात आला. सोमेश्वरचे अध्यक्ष पुरुषोत्तम जगताप, उपाध्यक्ष मिलिंद कांबळे, माजी सभापती प्रमोद काकडे, राष्ट्रवादीचे तालुकाध्यक्ष राजवर्धन शिंदे, रमाकांत गायकवाड, डॉ. देवीदास वायदंडे, डॉ. जगनाथ साळवे, सोमेश्वरचे संचालक ऋषिकेश गायकवाड, शैलेश रासकर, लक्ष्मण गोफणे, नीता फरांदे, सतीश सकुंडे, हेमंत गायकवाड, आदींनी पालखीचे स्वागत केले.