अल्पवयीन मुलीसमोर अश्लील कृत्य करणारा अटक, हिंगणे खुर्द परिसरातील घटना

याप्रकरणी सिंहगड रोड पोलिसांनी १९ वर्षीय तरुणावर पोक्सो कायद्यांतर्गत गुन्हा दाखल करून अटक केली आहे....

पुणे : एका मुलाने भररस्त्यात एका अल्पवयीन मुलीसमोर अश्लील कृत्य करून विनयभंग केल्याची घटना हिंगणे खुर्द परिसरात घडली. हा प्रकार ९ जानेवारी रोजी दुपारी साडेबारा ते एकच्या दरम्यान संगीता सुपर मार्केटजवळ घडला. याप्रकरणी सिंहगड रोड पोलिसांनी १९ वर्षीय तरुणावर पोक्सो कायद्यांतर्गत गुन्हा दाखल करून अटक केली आहे.

याबाबत पीडित मुलीच्या ४२ वर्षीय आईने मंगळवारी (दि. १६) सिंहगड रोड पोलिस ठाण्यात फिर्याद दिली. यावरून पोलिसांनी रोशन कुमार मुकेश सिंग (१९, रा. आनंद विहार, हिंगणे खु. पुणे) याच्यावर पोक्सो ॲक्टनुसार गुन्हा दाखल करून अटक केली आहे.

फिर्यादी यांची १२ वर्षांची मुलगी घराजवळ राहणाऱ्या मामीकडे जात होती. त्यावेळी आनंद विहार फेज २ येथील संगीता सुपर मार्केटजवळ आरोपी रोशन सिंग याने फिर्यादी यांच्या मुलीकडे पाहून अश्लील हातवारे केले, तसेच मुलीकडे पाहून अश्लील चाळे करून तिला लज्जा उत्पन्न होईल, असे धक्कादायक कृत्य केले. यानंतर आरोपीने वेळोवेळी मुलीचा पाठलाग करून त्रास दिला. हा प्रकार पीडित मुलीने आईला सांगितल्यानंतर त्यांनी सिंहगड रोड पोलिस ठाण्यात फिर्याद दिली. पोलिसांनी आरोपीवर विनयभंग व पोक्सो ॲक्टनुसार गुन्हा दाखल करून अटक केली. या प्रकरणाचा पुढील तपास पोलिस उपनिरीक्षक लोहार करत आहेत.