अभिनेत्री श्रेया बुगडे यांना यावर्षीचा राम नगरकर कलागौरव पुरस्कार जाहीर

पुरस्कार वितरण समारंभानंतर सुप्रसिद्ध निवेदक राजेश दामले हे श्रेया बुगडे यांची प्रकट मुलाखत घेणार आहेत

पुणे: राम नगरकर कला अकादमी आणि बेलवलकर सांस्कृतिक मंच यांच्या वतीने देण्यात येणारा राम नगरकर कलागौरव पुरस्कार यावर्षी सुप्रसिद्ध अभिनेत्री श्रेया बुगडे यांना जाहीर झाला आहे.

ख्यातनाम विनोदी अभिनेते राम नगरकर यांच्या स्मृती प्रीत्यर्थ दरवर्षी सदर पुरस्कार प्रदान करण्यात येतो. रुपये ११ हजार रोख व मानपत्र असे या पुरस्काराचे स्वरूप आहे. पुरस्काराचे हे सहावे वर्ष असून येत्या शनिवार दि. १४ मार्च रोजी सायंकाळी ५.३० वाजता टिळक रस्त्यावरील टिळक स्मारक मंदिर येथे होणाऱ्या एका विशेष कार्यक्रमात ज्येष्ठ अभिनेत्री वंदना गुप्ते यांच्या हस्ते श्रेया बुगडे यांना हा पुरस्कार प्रदान करण्यात येईल, असे राम नगरकर यांच्या स्नुषा डॉ. वैजयंती वंदन नगरकर आणि बेलवलकर सांस्कृतिक मंचचे संस्थापक समीर बेलवलकर यांनी कळवले आहे. पुरस्कार वितरण समारंभानंतर सुप्रसिद्ध निवेदक राजेश दामले हे श्रेया बुगडे यांची प्रकट मुलाखत घेतील.