Pune Crime | विनयभंग करून पळणाऱ्याला तरुणीने नागरिकांच्या मदतीने पकडले

गुरुवार पेठेत राहणाऱ्या एका २० वर्षाच्या तरुणीने फिर्याद दिली...

पुणेः विनयभंग करुन पळून जाणाऱ्या युवकाला स्वत: तरुणाीने नागरिकांच्या मदतीने पाठलाग करुन पकडले. त्यानंतर त्याला खडक पोलीस ठाण्यात घेऊन जाताना त्याने तरुणीच्या काकाला दाढीच्या वस्ताराने जखमी करण्याचा प्रयत्न केला. साहिल सुशिल अडागळे (वय १९, रा. गंज पेठ) असे या युवकाचे नाव आहे. याप्रकरणी गुरुवार पेठेत राहणाऱ्या एका २० वर्षाच्या तरुणीने फिर्याद दिली आहे.

पोलिसानी दिलेल्या माहितीनुसार, फिर्यादी तरुणी ही शिक्षण घेते. रविवारी (दि २७) रात्री ९ च्या सुमारास कामानिमित्त दुचाकीवरून बाहेर निघाली होती. त्यावेळी आरोपी अडागळे याने तिच्या मनाला लज्जा उत्पन्न होईल असे वर्तन केले. त्यानंतर तो तेथून पळून निघाला होता. दरम्यान फिर्यादी तरुणीने प्रसंगावधान राखत तेथील लोकांच्या मदतीने त्याला पाठलाग करून पकडले.

या तरुणीचा काका व ती अडागळेला घेऊन खडक पोलिस ठाण्यात येत होते. त्यावेळी अडागळे याने फिर्यादी तरुणीच्या काकासोबत झटापट करून कमरेला खोचलेल्या दाढी करण्याच्या वस्तारा काढून जखमी करण्याचा प्रयत्न केल्याचे फिर्यादीत म्हटले आहे. हा प्रकार समजताच खडक पोलिसांनी गुन्हा दाखल करून अडागळेला अटक केली आहे. अडागळे हा आठवीपर्यंत शिकला असून सध्या काहीही कामधंदा करत नाही. महिला पोलिस उपनिरीक्षक पवार अधिक तपास करीत आहेत.