पुणे : शिक्षण हक्क कायद्यांतर्गत (आरटीई) इंग्रजी माध्यमाच्या शाळांमधील २५ टक्के आरक्षित जागांवरील प्रवेशासाठी ऑनलाइन प्रवेश प्रक्रिया राबविली जात असून, येत्या ३१ जुलैपर्यंत प्रवेशासाठी मुदत दिली आहे. आतापर्यंत राज्यातील ८२ हजार १२९ जागांपैकी ५७ हजार ७३९ जागांवर विद्यार्थ्यांनी प्रवेश घेतला असून, अद्याप सुमारे २५ हजार विद्यार्थ्यांनी प्रवेश घेतलेला नाही. पुण्यात सर्वाधिक १० हजार ४५ विद्यार्थ्यांनी प्रवेश घेतला आहे.
राज्यातील ९ हजार ४३२ शाळांमधील आरटीईच्या ९६ हजार ६८४ जागांसाठी ऑनलाईन अर्ज मागविण्यात आले. तब्बल २ लाख २२ हजार ५८४ विद्यार्थ्यांनी अर्ज केले. त्यातील ८२ हजार १२९ विद्यार्थ्यांची ऑनलाईन लॉटरीच्या माध्यमातून प्रवेशासाठी निवड करण्यात आली. कोरोनामुळे विद्यार्थ्यांना प्रत्यक्ष शाळेत प्रवेश मिळण्यास अडचणी येत असल्याचे निदर्शनास आले. शिक्षण विभागातर्फे वेळोवेळी प्रवेशासाठी मुदत देण्यात आली. त्यामुळे गेल्या काही दिवसांमध्ये ५७ हजारांहून अधिक विद्यार्थ्यांना प्रवेश मिळाला.
राज्यात आरटीई प्रवेशाच्या पुणे जिल्ह्यात सर्वाधिक १४ हजार ५६७ जागा आहेत. त्यातील १० हजार जागांवर विद्यार्थ्यांनी प्रवेश घेतला आहे. त्यामुळे जिल्ह्यातील आरटीईच्या केवळ चार हजार जागाच रिक्त आहेत. अनेक इंग्रजी माध्यमाच्या शाळांनी आरटीई प्रवेशावर बहिष्कार घालण्याचे जाहीर केले होते. मात्र, तरीही बहुतांश जागांवर विद्यार्थ्यांना प्रवेश मिळाला आहे. परंतु, प्रवेशास मुदतवाढ द्यावी किंवा देऊ नये याबाबतचा निर्णय पुढील दोन दिवसांत घेतला जाईल, असे राज्याचे प्राथमिक शिक्षण संचालक दिनकर टेमकर यांनी सांगितले.
-----------------
आरटीई अंतर्गत प्रवेश मिळालेले विद्यार्थी
जिल्हा जागा प्राप्त अर्ज लॉटरीतून दिलेले प्रवेश शाळेत झालेले प्रवेश
पुणे १४,७७३ ५५,८१३ १४,५७६ १०,०४५
मुंबई ५,२२७ १२,९११ ३,८२५ २,०८८
नाशिक ४,५४४ १३,३३० ४,२०८ ३,१५०
नागपूर ५,७२९ २४,१६७ ५,६११ ४,०७८
ठाणे १२,०७४ १८,९५६ ९,०८८ ६,१५३
जळगाव ३,०५६ ५,९३९ २,६९२ २,१७४
औरंगाबाद ३,६२५ ११,८१६ ३,४७० २,३५८
जालना २,२६२ ३,५८४ १,९१८ १,०१८
नांदेड १,७२० ५,३१८ १,६०४ १,००४
यवतमाळ १,२७५ ३,३९३ १,१५१ ८६५
बीड २,२२१ ३,९३८ २,०१२ १,३६०
भंडारा ७९१ २,०५१ ७८४ ६११
अकोला १,९६० ४,७७ १,८१७ १,४२८
अहमदनगर ३,०१३ ४,८२५ २,७५३ २,०४२
सोलापूर २,२३१ ४,२५२ १,७३८ १,०५०
कोल्हापूर ३,१८१ २,६४५ २,१३७ १,४४८
सातारा १,९१६ २,५०० १,५९५ १,०३९
सांगली १,६६७ १,४४६ ९८९ ७५८
--------------------------------------