पिंपरी : नोकरी, विविध अभ्यासक्रमांचे प्रवेश आणि परीक्षांसाठी उत्पन्नाचा दाखला, जातीचा दाखला, नॉन-क्रिमीलेअर यासारख्या कागदपत्रांची गरज भासते. मात्र, ‘सर्व्हर डाउन’च्या तांत्रिक अडचणीमुळे दाखले मिळण्यास विलंब होत आहे. परिणामी, पिंपरी-चिंचवड अपर तहसील कार्यालयात तब्बल ४,८६२ दाखले प्रलंबित असून, विद्यार्थी आणि पालकांना तहसील कार्यालयात चकरा माराव्या लागत आहेत.
शासनाने दाखल्यांसाठी डिजिटल प्रणाली लागू केली असली, तरी कागदोपत्री कार्यवाही पूर्ण झाल्यानंतरही सरकारी सर्व्हर वारंवार बंद पडत आहे. यामुळे दाखले मिळण्यास उशीर होत असून, विद्यार्थ्यांचे प्रवेश आणि नोकरीसाठी प्रयत्न करणाऱ्या तरुणांची गैरसोय होत आहे. तर १ एप्रिल ते ३१ मे २०२५ दरम्यान तहसील कार्यालयातून ३३,२३१ दाखले वितरित करण्यात आले आहेत.
साधारण २० मेनंतर सर्व्हर सतत बंद होण्यास सुरुवात झाली. मात्र, सोमवारपासून सर्व्हर काही प्रमाणात सुरळीत झाले असून रात्रीचे सर्व्हर चांगल्या पद्धतीने चालत असल्याचे तहसील प्रशासन सांगत आहे.
तहसीलमधील दाखल्यांची परिस्थिती
(१ एप्रिल २०२५ ते ३१ मे २०२५)
दाखला - मंजूर - ना मंजूर - प्रलंबित
- उपन्न - २३,७४३ - १९५ - २,२५५
- रहिवासी - १,४४५ - ३ - १९०
- अधिवास (डोमिसाईल) - ५,७२६ - ९४ - १,६७०
- ज्येष्ठ नागरिक - २२१ - ० - २२
- जात प्रमाणपत्र - ७६२ - २ - १४६
- महिला आरक्षण - १४ - ० - १
- आर्थिक दुर्बल घटक - ४९१ - १० - ९७
- नॉन-क्रिमीलेअर - ८३० - १ - ४८१
....................
एकूण - ३३,२३२ - ३०५ - ४,८६२
---------
या दाखल्यांसाठी किचकट प्रक्रिया
नॉन-क्रिमीलेअर प्रमाणपत्रासाठी खूप वेळ काढू प्रक्रिया असून त्यासाठी ओळखपत्र, १५ वर्षे पूर्वीचा रहिवासी पुरावा, जातीचे प्रमाणपत्र, तीन वर्षांचे तहसीलदार यांचे उत्पन्नाचे प्रमाणपत्र, वडिलांचा शाळा सोडल्याचा दाखला, १९६९ पूर्वीचा वडील, चुलते, आत्या, आजोबा यांपैकी एकाचा शाळा सोडल्याचा दाखला तसेच लग्नापूर्वी आणि नंतरचे नाव बदलल्याचा पुरावा आदी कागदपत्रे आवश्यक आहेत. हे कागदपत्रे नसल्यास अगोदर हे कागदपत्रे मिळवायचे, त्यानंतर नॉन-क्रिमीलेअर प्रमाणपत्रासाठी अर्ज करावा लागतो.
दाखल्यासाठी शुल्क व कालावधी
सेवा प्रकार - शुल्क (रु.) - कालावधी (दिवस)
सर्व साधारण प्रतिज्ञापत्र - ६९ - १
वय, अधिवास, राष्ट्रीय प्रमाणपत्र - ६९ - १५
उत्पन्न दाखला (३ वर्षे व १ वर्षे) - ६९ - १५
जातीचा दाखला - १२८ - ४५
नॉन क्रिमीलेअर प्रमाणपत्र - १२८ - ४५
केंद्र सरकार जात प्रमाणपत्र - १२८ - ४५
आर्थिक दुर्बल घटक प्रमाणपत्र - ६९ - १५
स्थानिक वास्तव्याचा दाखला - ६९ - १५
रहिवासी दाखला - ६९ - १५
महिला आरक्षण - ६९ - ३०
ज्येष्ठ नागरिक दाखला - ६९ - १५
सर्व्हरचे अपडेट सुरू असल्याने दाखले मिळण्यास विलंब होत असून सध्या प्रणाली रात्रीच्या वेळी सुरळीत चालते. त्यामुळे रात्रीचे काम केले जात आहे. पुढील आठवड्यात सर्व प्रलंबित दाखले वितरित होऊ शकतात. - जयराज देशमुख, अपर तहसीलदार, पिंपरी चिंचवड