भोर: तालुक्याच्या दृष्टीने अत्यंत महत्त्वाचा असलेला कापूरव्हेळ-भोर-मांढरदेवी-सुरुर या रस्त्याच्या कामाला २७६ कोटींचा निधी मंजूर झाला आहे. त्यातील ३५ कोटी वर्ग करण्यात आले असून लवकरच प्रत्यक्ष कामाला सुरुवात होणार असल्याची माहिती आमदार संग्राम थोपटे यांनी दिली.
आमदार थोपटे म्हणाले, कापूरव्होळ-मांढरदेवी-सुरूर या ५७ किमी लांबीच्या रस्त्याच्या कामासाठी अंदाजित रक्कम सुमारे २७६ कोटी रुपयांचा प्रकल्प अहवाल तयार करुन शासनाकडे मंजुरीसाठी सादर केला होता. हिवाळी अधिवेशनात प्रस्तावित केलेल्या कामाला पुरवणी मागणीत २७६ कोटी २५ लाख रुपयांचा निधीला मंजुरी मिळाली आहे. एक डिसेंबरला प्रशासकीय मान्यता मिळाली असून, या वर्षीच्या २०/२१ साठी अर्थसंकल्पात ३५ कोटी रु तरतूद करण्यात आली आहे. सदर रस्त्यामुळे मांढरदेवी आणि महाबळेश्वरला जाणे जवळ होणार असून यामुळे पर्यटनाला चालना मिळणार असल्याचेही त्यांनी सांगितले.
भोर-कापूरव्होळ रस्ता अत्यंत अरुंद असून वेडीवाकडी वळणे आहेत. शिवाय साईट पट्ट्या खचल्या आहेत. अनेक ठिकाणी झाडे-झुडुपे वाढली आहेत. तीव्र उताराचा रस्ता आहे. यामुळे वारंवार अपघात घडत आहेत तर भोरपासून आंबाडखिंड घाट ते मांढरदेवी व वाई तालुक्यातील घाट रस्ता असून, अनेक भागांत रस्ता अरुंद असून घाटात मोठ्या प्रमाणात उतार असून डोंगराच्या भागातून पावसाळ्यात मोठ्या प्रमाणात दरडी पडून रस्ता बंद होतो. यामुळे घाटातून पर्यटक येण्यास फारसे उत्सुक नसतात. त्यामुळे अनेक पर्यटक पुणे-सातारा रस्ता मार्गाने सुरूर फाट्यावरून महाबळेश्वरला जाणेच पसंत करतात.
दरम्यान, भोर मांढरदेवी वाई हा राज्यमार्ग क्रमांक ११९ चे एशियन बँक डेव्हलपमेंटच्या माध्यमातून रुंदीकरणाचे मजबुतीकरण,डांबरीकरण यामध्ये साखळी क्रमांक ७६ ते १३३ पॉइंट ७४० या लांबीतील ५७.७४० किलोमीटर काम प्रस्तावित करण्यात आले आहे. दहा मीटर रुंदीचा रस्ता होणार असून डांबरीकरण पृष्ठभागाची रुंदीकरण करून त्यावर बाजूने दीड मीटर रुंदीचे मुरमीकरण व पावसाळी गटारे काढण्यात येणार आहेत.
कापूरव्होळ भोर मांढरदेवी वाई हा रस्ता अत्यंत महत्त्वाचा असून कामाला प्रशासकीय मान्यता मिळाली आहे. लवकरच निविदा निघून प्रत्यक्ष कामाला सुरुवात होणार आहे. सदरचा रस्ता विकसित झाल्यावर भोरमार्गे मांढरदेवीला जाणाऱ्या भाविकांना आणि महाबळेश्वरला जाणाऱ्या पर्यटकांना पर्यायी आणि जवळचा रस्ता उपलब्ध होणार आहे
योगेश मेटेकर, शाखा अभियंता, सार्वजनिक बांधकाम विभाग