भाजपचे आमदार गोपीचंद पडळकर यांनी शिवसेनेचे नेते आणि खासदार संजय राऊत यांच्यावर जोरदार निशाणा साधला. "आपल्या हुजुरेगिरीमुळे बावचळलेले संजय राऊत भोकं पडलेल्या फुग्याला का घाबरताहेत? असं तर नाही ना की नारायण राणे यांचा फुगा तुमच्या विषयीच्या गुपितानं भरलाय?," असा सवालही पडळकर यांनी केला. त्यांनी ट्विटरवर एक व्हिडीओ शेअर करत संजय राऊतांवर टीकेचा बाण सोडला.
"असं तर नाही ना की नारायण राणे यांचा फुगा तुमच्या विषयीच्या गुपितानं भरलाय? जो फुटला तर तिन्ही धन्यांचा तुमच्यावरचा विश्वास उडेल. नारायण राणे यांच्यावरील सूडाची कारवाई ही कायद्याची कारवाई असं तुम्ही संबोधता. पण पोलिसांना आयाबहिणींवरून शिव्या देणाऱ्या वरूण देसाई यांना अटक का नाही केली? हेच का तुमचं महाराष्ट्र मॉडेल?," असा सवालही पडळकरांनी केला.
"सामनाचं 'बाबरनामा'त रुपांतर"मला बाळासाहेबांच्या दैनिक सामनाचं दैनिक बाबरनामात रूपांतर करणाऱ्यांना हेच विचारायचंय की त्यावेळी तुमची अस्मिता कोणाच्या पायापुढे लोटांगण घालते. कोणापुढे तुम्ही नतमस्तक होता. संजय राऊत कंबरेचं सोडून डोक्याला बांधून अग्रलेख लिहिण्याच्या विकृतीला बांध घाला, अन्यथा तुमच्या हम करे सो कायद्याच्या फुग्याला देशाच्या कानाकोपऱ्यातून भोकं पडतील अशी टीकाही पडळकर यांनी केली.