पिंपरी : अल्पवयीन मुलीला आत्महत्येस प्रवृत्त केल्याप्रकरणी तरुणाला अटक करण्यात आली आहे. त्याला न्यायालयात हजर केले असता शनिवारपर्यंत (दि. १७) पोलीस कोठडी सुनावण्यात आली आहे.
विजय दत्तात्रय पवार (वय २७, रा. पिंपळे सौदागर, मुळ रा. प्रसाद नगर, ता. जि. परभणी), असे अटक केलेल्या आरोपीचे नाव आहे. मयत मुलीच्या आईने याप्रकरणी सांगवी पोलीस ठाण्यात मंगळवारी (दि. १३) फिर्याद दिली आहे.
पोलिसांनी दिलेल्या माहितीनुसार, मयत १६ वर्षीय मुली सोबत काढलेले फोटो आरोपीने स्वतःच्या फेसबूक व इंस्टाग्रामवर पोस्ट करून इतर मित्रांना टॅग केला. तिची बोलण्याची इच्छा नसतानाही तिच्याशी बोलण्याचा प्रयत्न करून आरोपी तिला भेटण्यास बोलावत होता. आरोपीने फिर्यादीच्या मुलीची बदनामी केली. त्या बदनामीमुळेच फिर्यादीच्या मुलीने सोमवारी (दि. १२) दुपारी एकच्या सुमारास राहत्या घरात छताच्या अँगलला ओढणीच्या सहाय्याने गळफास घेतला. तिला आत्महत्येस प्रवृत्त केल्याप्रकरणी तिच्या आईने तक्रार केली. त्यानुसार गुन्हा दाखल करून पोलिसांनी आरोपीला अटक केली. पोलीस उपनिरीक्षक कविता रुपनर तपास करीत आहेत.