धक्कादायक! पत्नीवर गुन्हा दाखल झाल्याने पतीची आत्महत्या; चऱ्होली येथील खळबळजनक घटना

कुमार यांची पत्नी प्रीती ऐश्वर्य या रिअल इस्टेट क्षेत्रात कार्यरत आहेत. काही दिवसांपूर्वी त्यांच्यावर ठाणे येथे एका प्रकरणात गुन्हा दाखल झाला होता.

नारायण बडगुजर

रिअल इस्टेटच्या व्यवसायात असलेल्या पत्नीवर ठाणे येथे गुन्हा दाखल झाल्याच्या तणावातून, पिंपरी-चिंचवडमधील चऱ्होली येथे एका ३९ वर्षीय व्यक्तीने विष प्राशन करून आत्महत्या केली. आरोपांमुळे पती-पत्नीमध्ये वाद होत होते, ज्याचा शेवट या दुर्दैवी घटनेने झाला.

काय आहे नेमकं प्रकरण?

कुमार ऐश्वर्य (वय ३९, रा. चऱ्होली बुद्रुक) असे आत्महत्या केलेल्या व्यक्तीचे नाव आहे. पोलीस तपासात समोर आलेल्या माहितीनुसार, कुमार यांची पत्नी प्रीती ऐश्वर्य या रिअल इस्टेट क्षेत्रात कार्यरत आहेत. काही दिवसांपूर्वी त्यांच्यावर ठाणे येथे एका प्रकरणात गुन्हा दाखल झाला होता. आपल्या पत्नीवर फौजदारी गुन्हा दाखल झाल्यामुळे कुमार प्रचंड मानसिक तणावाखाली होते.

वादातून टोकाचे पाऊल

२९ जानेवारी रोजी याच कारणावरून कुमार आणि प्रीती यांच्यात भांडण झाले. या वादाच्या भरातच कुमार यांनी विषारी औषध प्राशन केले. काही वेळाने त्यांना रक्ताच्या उलट्या आणि जुलाब होऊ लागल्याने पत्नीने त्यांना तातडीने एका खासगी रुग्णालयात दाखल केले. रुग्णालयातील उपचारांना कुमार सुरुवातीला चांगला प्रतिसाद देत होते आणि त्यांच्या प्रकृतीत सुधारणा होत असल्याचे दिसत होते.

उपचारादरम्यान मृत्यू

मात्र, रविवारी रात्री अचानक कुमार यांची प्रकृती खालावली. डॉक्टरांनी शर्थीचे प्रयत्न करूनही रात्री साडेदहाच्या सुमारास उपचारादरम्यान त्यांचा मृत्यू झाला. या घटनेने चऱ्होली परिसरात हळहळ व्यक्त केली जात आहे. दिघी पोलीस ठाण्याचे वरिष्ठ पोलीस निरीक्षक प्रमोद वाघ यांनी या घटनेला दुजोरा दिला असून, पोलीस अधिक तपास करत आहेत.