LPG Gas Crisis : महाप्रसादासाठी चुलींचा पुनर्वापर; पारंपरिक पद्धतींना नवे बळ

- ग्रामीण भागात सार्वजनिक कार्यक्रमात चुली पेटवून पारंपरिक पद्धतीने महाप्रसादाचे नियोजन

लोणावळा : गॅस सिलिंडर टंचाईच्या पार्श्वभूमीवर मावळ तालुक्यातील ग्रामीण भागात महाप्रसादासाठी पुन्हा पारंपरिक चुलींचा वापर वाढताना दिसत आहे. चैत्र महिन्यातील यात्रा, अखंड हरिनाम सप्ताह आणि भंडाऱ्यांच्या आयोजनासाठी ग्रामस्थांनी एकत्र येत जुनी पद्धत स्वीकारली आहे.

गॅस उपलब्ध न झाल्याने अनेक गावांमध्ये मोठ्या चुली (रहाळ) तयार करून लाकूडफाट्यावर स्वयंपाक केला जात आहे. महाप्रसादासाठी लागणारे अन्न मोठ्या प्रमाणात शिजवताना चुली हा पर्याय अधिक उपयोगी ठरत असल्याचे ग्रामस्थांचे मत आहे. पाटण गावातील एका ज्येष्ठ नागरिकाने सांगितले की, ‘पूर्वी सर्व धार्मिक कार्यक्रमांचा स्वयंपाक चुलीवरच होत असे. आता पुन्हा त्याच पद्धतीने महाप्रसाद तयार केला जात आहे. त्यामुळे जुन्या परंपरा जिवंत होत आहेत.’

चुलीवर स्वयंपाक करताना लाकूड गोळा करण्यासाठी अधिक मेहनत घ्यावी लागत असून, धुरामुळे महिलांना व स्वयंपाक करणाऱ्यांना काही प्रमाणात त्रास सहन करावा लागत आहे. तसेच या पद्धतीत वेळ अधिक लागतो. तरीही ग्रामस्थांनी एकोप्याने सर्व अडचणींवर मात केली आहे.  महाप्रसादानिमित्ताने गावोगावी उत्साहाचे वातावरण असून, सामूहिक सहभागातून धार्मिक कार्यक्रम यशस्वीपणे पार पडत आहेत. गॅस टंचाईमुळे आलेल्या अडचणींना संधी मानत ग्रामीण भागात पारंपरिक चुलींचा पुनर्जन्म झाल्याचे चित्र सध्या पाहायला मिळत आहे.