Pimpari-chinchwad : बेशिस्त वाहनचालकांनो, तुमच्यावर आता सजग नागरिकांची नजर...!

वाहतूक पोलिसांच्या ‘ट्राफिक बडी’ व्हॉट्सॲप तक्रार प्रणालीवर नागरिकांनी केल्या दहा हजार तक्रारी 

- रवींद्र जगधने

पिंपरी : शहरातील रस्त्यांवर वाहतूक पोलिस नसले तरी आता बेशिस्त वाहनचालकांना मोकळे रान मिळणार नाही. कारण सजग नागरिक थेट व्हॉट्सॲपद्वारे त्यांच्या उल्लंघनाची तक्रार पोलिसांकडे करू शकतात. पिंपरी-चिंचवड वाहतूक पोलिसांनी सुरू केलेल्या ‘ट्राफिक बडी’ या व्हॉट्सॲप चॅटबॉट प्रणालीने हे शक्य झाले आहे. याप्रणालीद्वारे सोमवारपर्यंत (दि. १६) नऊ हजार ८७२ तक्रारी प्राप्त झाल्या आहेत.

ही प्रणाली स्थान-आधारित असल्याने खोट्या तक्रारी टाळता येतात आणि नागरिकांना त्यांच्या तक्रारीवर घेण्यात येणाऱ्या कारवाईची माहितीही मिळते. ट्राफिक बडी ही एक सोपी व्हॉट्सॲप-आधारित चॅटबॉट प्रणाली आहे. १७ जुलै २०२५ मध्ये सुरू झालेली ही सुविधा आता पूर्णपणे कार्यान्वित आहे. नागरिक ८७८८६४९८८५ या क्रमांकावर व्हॉट्सॲप करतात. प्रणाली स्थान-आधारित (लोकेशन-बेस्ड) असल्याने तक्रारदाराच्या स्थानाची पडताळणी होते. तक्रार नोंदविल्यानंतर पोलिसांकडून त्वरित प्रतिसाद मिळतो आणि कारवाई सुरू होते.

कोणत्या प्रकारच्या तक्रारी करता येतात?

याप्रणालीद्वारे वाहतूक कोंडी, रस्त्यांवरील खड्डे किंवा खराब रस्ते, सिग्नल तोडणे, हेल्मेट न घालणे, अवैध पार्किंग अशा वाहतूक नियमांचे उल्लंघन झाल्यास तक्रार करता येते. या व्यतिरिक्त, रस्त्यावरील अडथळे किंवा इतर सुरक्षा-संबंधित मुद्देही नोंदविता येतात. ही प्रणाली फक्त वाहतूक विभागाशी संबंधित आहे, म्हणजे गुन्हेगारी किंवा इतर प्रकारच्या तक्रारी येथे स्वीकारल्या जात नाहीत.

कशी तक्रार करावी?

तक्रार करणे अगदी सोपे आहे. फक्त ८७८८६४९८८५ या क्रमांकावर व्हॉट्सॲप करा आणि ‘हाय’ किंवा ‘हॅलो’ असा मेसेज पाठवा. त्यानंतर चॅटबॉट तुम्हाला पर्याय देतो. जसे की तक्रार नोंदवणे, स्थिती जाणून घेणे किंवा सूचना देणे. तक्रार नोंदविताना फोटो, व्हिडीओ किंवा लोकेशन शेअर करा. प्रणाली तुम्हाला तक्रारीचा आयडी देते आणि कारवाईची अपडेट्स पाठवते. या सुविधेसाठी ॲप डाउनलोड करण्याची गरज नाही, फक्त व्हॉट्सॲप असणे पुरेसे आहे.

या तक्रारी होतात नामंजूर

सर्व तक्रारी स्वीकारल्या जात नाहीत. स्थान-आधारित प्रणालीमुळे खोटी माहितीच्या तक्रारी नामंजूर होतात. तक्रारदार घटनास्थळी नसल्यास किंवा पुरावा (फोटो / व्हिडीओ) नसल्यास तक्रार रद्द केली जाते. तसेच, वाहतूक व्यतिरिक्तच्या तक्रारी नामंजूर होतात. अशा एक हजार ८५५ तक्रारी नामंजूर झाल्या आहेत.

रस्त्याची तक्रार महापालिकेकडे

रस्ते खराब असणे, खड्डे किंवा इतर दुरुस्ती-संबंधित तक्रारी ट्राफिक बडीद्वारे स्वीकारल्या जातात, पण त्या पिंपरी-चिंचवड महापालिकेकडे पाठवल्या जातात. पोलिस महापालिकेशी समन्वय साधून दुरुस्ती करून घेतात. समस्या सुटली नाही तर मासिक फॉलो-अप घेतले जाते. यामुळे नागरिकांना एकाच ठिकाणी तक्रार करून उपाय मिळतो. रस्त्यांसंदर्भात ३२० तक्रारी प्राप्त झाल्या आहेत.

ट्राफिक बडी ही स्थान-आधारित प्रणाली आहे. ही राज्यातील पहिली योजना आहे. ही प्रणाली शहरातील वाहतूक व्यवस्था मजबूत करण्यासाठी महत्त्वाची ठरत आहे. सजग नागरिकांनी याचा सक्रिय वापर करावा. - विवेक पाटील, पोलिस उपायुक्त, वाहतूक शाखा, पिंपरी-चिंचवड पोलिस