पिंपरी : पिंपरी वाहतूक विभागातील महिला पोलिस शिपाई आणि ट्रॅफिक वॉर्डन यांनी रिक्षाचालकाकडून ४०० रुपयांच्या लाचेची मागणी करून लाच स्वीकारल्याप्रकरणी लाच लुचपत प्रतिबंधक विभागाने कारवाई करत दोघांना रंगेहात पकडले. या प्रकरणी संत तुकाराम नगर पोलिस ठाण्यात गुन्हा दाखल करण्यात आला आहे.
पोलिस अंमलदार वर्षा विठ्ठल कांबळे (वय ३५) व ट्रॅफिक वॉर्डन कृष्णा मछिंद्र गव्हाणे (वय २८) अशी गुन्हा दाखल झालेल्यांची नावे आहेत. पोलिसांनी दिलेल्या माहितीनुसार, तक्रारदार हा रिक्षाचालक असून तो पिंपरी, मोरवाडी, केएसबी चौक परिसरात प्रवासी वाहतूक करतो. दि. १७ नोव्हेंबर रोजी जादा प्रवासी वाहतूक केल्याच्या कारणावरून महिला पोलिस अंमलदार वर्षा कांबळे व ट्रॅफिक वॉर्डन कृष्णा गव्हाणे यांनी तक्रारदार रिक्षा चालकाकडून ३०० रुपये घेतले. त्यानंतर २६ नोव्हेंबर रोजी पुन्हा रिक्षा अडवून दरमहा ‘हफ्ता’ म्हणून ५०० रुपयांची लाच मागितल्याची तक्रार लाच लुचपत प्रतिबंधक विभागाकडे तक्रारदाराने केली.
लाच लुचपत प्रतिबंधक विभागाने पडताळणी केली असता संशयितांनी ४०० रुपयांच्या लाचेची मागणी केल्याचे स्पष्ट झाले. त्यानुसार शनिवारी केएसबी चौकात सापळा रचण्यात आला. यावेळी ट्रॅफिक वॉर्डन गव्हाणे यांनी तक्रारदाराकडून ४०० रुपयांची लाच स्वीकारताच त्यांना रंगेहात पकडण्यात आले. त्यानंतर महिला पोलिस शिपाई कांबळे हिलाही ताब्यात घेण्यात आले. नागरिकांनी लाच मागणी झाल्यास तातडीने लाच लुचपत प्रतिबंधक विभागाशी संपर्क साधावा, असे आवाहन लाचलुचपत प्रतिबंधक विभागाचे पोलिस अधीक्षक शिरीष सरदेशपांडे यांनी केले आहे.
Web Summary : A female police officer and traffic warden in Pimpri were arrested for accepting a ₹400 bribe from a rickshaw driver. They demanded money for allowing excess passengers and monthly fees. Anti-Corruption Bureau caught them red-handed.
Web Summary : पिंपरी में महिला पुलिसकर्मी और ट्रैफिक वार्डन को रिक्शा चालक से ₹400 की रिश्वत लेते गिरफ्तार किया गया। उन्होंने अधिक यात्रियों और मासिक शुल्क के लिए पैसे मांगे। भ्रष्टाचार निरोधक ब्यूरो ने उन्हें रंगे हाथों पकड़ा।