पिंपरी-चिंचवड ‘आरटीओ’त खरमाटेंचे ‘वसुली रॅकेट’? विजय वडेट्टीवार यांच्या आरोपानंतर चर्चेस ऊत 

- सध्या ते काही सहकाऱ्यांच्या मदतीने राज्यभर वसुलीचे रॅकेट चालवत असल्याचा आरोप आहे.

पिंपरी : आरटीओ विभागात बदली आणि वसुलीचे संगनमताने चालणारे रॅकेट राज्यभर कार्यरत असल्याचा आरोप काँग्रेसचे नेते विजय वडेट्टीवार यांनी मुंबईत पत्रकार परिषदेत केला. या रॅकेटचे सूत्रधार म्हणून सेवानिवृत्त उपप्रादेशिक परिवहन अधिकारी बजरंग खरमाटे यांचे नाव पुढे आले असून, पुणे आणि पिंपरी-चिंचवड आरटीओ कार्यालयांमध्येही त्यांची यंत्रणा सक्रिय असल्याचा दावा करण्यात आला आहे. त्यामुळे उलटसुलट चर्चा सुरू झाली आहे.

पूर्वीच्या परिवहनमंत्र्यांच्या कार्यकाळात खरमाटे यांनी बदलीप्रक्रियेत हस्तक्षेप करत स्वतंत्र जाळे उभे केले होते. सध्या ते काही सहकाऱ्यांच्या मदतीने राज्यभर वसुलीचे रॅकेट चालवत असल्याचा आरोप आहे. या माध्यमातून अधिकाऱ्यांवर दबाव टाकून मनासारख्या बदल्या आणि आर्थिक व्यवहार घडवून आणले जात असल्याचे वडेट्टीवार त्यांनी नमूद केले.

चंद्रपूर येथे काही अधिकाऱ्यांनी या दबावाला विरोध केल्यावर त्यांच्यावर कारवाई घडवून आणण्यासाठी पोलिस यंत्रणेचा गैरवापर केल्याचा आरोपही करण्यात आला. लाचलुचपत प्रतिबंधक विभागामार्फत बनावट सापळे रचून कारवाई करण्यात आल्याचेही त्यांनी सांगितले. खरमाटे हे पोलिस अधिकाऱ्यांच्या माध्यमातून संपूर्ण यंत्रणेवर दबाव निर्माण करत असल्याचा दावा त्यांनी केला.

दरम्यान, पुणे आणि पिंपरी-चिंचवड आरटीओमध्ये काही मोटार वाहन निरीक्षक आणि सहायक निरीक्षक या कथित यंत्रणेच्या दबावाखाली काम करत असल्याचे पुढे आले आहे. खरमाटे यांच्या सांगण्यावरून नियमांना बगल देत कामे करण्यास भाग पाडले जात असून, त्याचा थेट परिणाम सामान्य नागरिकांवर होत असल्याचा आरोप करण्यात आला. काही अधिकारी स्वेच्छेने या वसुलीच्या साखळीत सहभागी असल्याचेही सूचित करण्यात आले.

पीसीएमसी आरटीओ ताब्यात घेण्यासाठी हालचाली

राज्यभर वसुली रॅकेटच्या आरोपांदरम्यान आता पुणे आणि पिंपरी-चिंचवड आरटीओ कार्यालयांवर नियंत्रण मिळवण्यासाठी ‘खरमाटे यंत्रणे’च्या हालचाली सुरू असल्याची चर्चा आहे. स्थानिक पातळीवर प्रभाव वाढवण्यासाठी आणि यंत्रणा ताब्यात घेण्यासाठी काही अधिकाऱ्यांमार्फत सक्रिय प्रयत्न सुरू असल्याची माहिती सूत्रांकडून मिळत आहे.