Travel : काश्मीर ट्रीपच्या बजेटमध्ये आरामात फिरू शकता 'हा' देश; ५ दिवसांत मनसोक्त करता येईल भटकंती!

परदेशात फिरण्याची इच्छा प्रत्येकाची असते, पण आंतरराष्ट्रीय प्रवासाचा मोठा खर्च बघून अनेकांचे स्वप्न अर्धवट राहते. मात्र, आता तुमचा हा विचार बदलण्याची वेळ आली आहे! तुम्ही जर काश्मीरमध्ये १० दिवसांच्या ट्रिपचा प्लॅन करत असाल आणि त्यासाठी साधारण ५० ते ८० हजार रुपये खर्च करत असाल, तर याच बजेटमध्ये तुम्ही एका अत्यंत सुंदर आणि स्वस्त विदेशी ठिकाणाला भेट देऊ शकता. तो देश म्हणजे व्हिएतनाम! विशेष म्हणजे, येथे भारतीय १,००० रुपयांचे मूल्य तब्बल ३ लाख व्हिएतनामी 'डोंग' इतके आहे.

व्हिएतनाम प्रवासातील सर्वात मोठा खर्च म्हणजे विमानाचे तिकीट. मात्र, व्हिएतनाममध्ये जाण्यासाठी तुम्हाला अगदी कमी खर्चात तिकीट मिळू शकते. साधारण दिवसांमध्ये मुंबई किंवा दिल्ली ते व्हिएतनाम (हानोई किंवा हो ची मिन्ह सिटी) विमान तिकीट ₹१२,००० ते ₹१५,००० मध्ये उपलब्ध होते. जर तुम्ही बऱ्याच दिवसांपूर्वी ट्रिपचे नियोजन केले, तर येण्या-जाण्याचा एकूण खर्च ₹२०,००० ते ₹२२,००० पर्यंत खाली येऊ शकतो.

२० ते २२ हजार रुपयांचे विमान तिकीट गृहीत धरल्यास, तुम्ही उर्वरित ₹३०,००० ते ₹४०,००० मध्ये व्हिएतनाममध्ये १० दिवसांची ट्रिप पूर्ण करू शकता. याचे मुख्य कारण म्हणजे व्हिएतनाममधील राहणे आणि खाणे अतिशय स्वस्त आहे. या देशात हॉटेल्स आणि बजेट हॉस्टेल्स कमी दरात उपलब्ध आहेत.

व्हिएतनाममधील स्ट्रीट फूड अत्यंत स्वस्त आणि चविष्ट असते. 'जो डे थाम', 'फाम न्गु लाओ' आणि 'बुई विएन' यांसारख्या ठिकाणी तुम्हाला कमी पैशात चांगले रेस्टॉरंट मिळतील, ज्यामुळे तुमच्या खिशावर अतिरिक्त ताण पडणार नाही. तुम्ही जर दररोज ₹१,५०० ते ₹२,००० जरी खर्च केला, तरी १० दिवसात तुमचा खाण्याचा खर्च ₹२०,०००च्या आसपास राहील. अशा प्रकारे, विमान खर्च आणि येथील खर्च मिळून तुम्ही सुमारे ₹४५,००० ते ₹५५,००० मध्ये व्हिएतनामची अविस्मरणीय सहल पूर्ण करू शकता.

दक्षिण-पूर्व आशियातील व्हिएतनाम निसर्गरम्य आणि ऐतिहासिक वारसा लाभलेला देश आहे. या देशातील 'हा लॉन्ग बे' समुद्रातील हजारो उंच चुनखडीच्या बेटांचे हे नैसर्गिक सौंदर्य तुमचे मन मोहून टाकेल. येथील गुंफा पाहण्याचा अनुभव अविस्मरणीय असतो.

जर तुम्हाला शहराच्या गजबजाटापासून दूर, शांत आणि निसर्गरम्य ठिकाणी जायचे असेल तर व्हिएतनाममधील 'सापा' व्हॅली एक उत्तम पर्याय आहे. व्हिएतनामचा रक्तरंजित इतिहास जाणून घेण्यासाठी 'क्यू ची' येथील भुयारी मार्गांना नक्की भेट द्या. बोटिंग, ट्रेकिंग आणि निसर्गरम्य शांततेचा आनंद घेण्यासाठी 'बा बा नॅशनल पार्क' हे ठिकाण सर्वोत्तम आहे. येथे रात्री थांबण्याची सोयही उपलब्ध आहे.

व्हिएतनाम ट्रिपवर जाताना काही गोष्टींची काळजी घेणे आवश्यक आहे. व्हिएतनाममध्ये स्ट्रीट फूडचे स्टॉल्स रात्री ८ वाजेपर्यंत बंद होतात, त्यामुळे रात्रीच्या जेवणाचे नियोजन वेळेत करा. येथील 'सूप'सारख्या डिशेशमुळे अनेकदा अन्न विषबाधा होण्याचा धोका असतो. त्यामुळे कोणत्याही रेस्टॉरंटमध्ये खाताना अन्न चांगले शिजलेले आहे की नाही, याची खात्री करून घ्या.

खाण्यामुळे तब्येत बिघडल्यास तुमचा संपूर्ण प्रवास खराब होऊ शकतो. कमी बजेटमध्ये परदेशात फिरण्याची इच्छा पूर्ण करण्यासाठी व्हिएतनाम सध्या भारतीयांसाठी सर्वात उत्तम पर्याय ठरत आहे.