Travel : 'भारताचं स्कॉटलँड' पाहिलंय का? उन्हाळ्याच्या सुट्टीत मनाली-शिमला सोडा, 'या' नंदनवनाला नक्की भेट द्या!

भारतात एक असं ठिकाण आहे, ज्याला त्याच्या अफाट सौंदर्यामुळे 'भारताचे स्कॉटलँड' असं म्हटलं जातं.

उन्हाळ्याचा कडाका वाढला की प्रत्येकाला वेध लागतात ते थंड हवेच्या ठिकाणांचे. अनेकदा आपण शिमला, मनाली किंवा महाबळेश्वरला जाण्याचा विचार करतो. पण तुम्हाला माहीत आहे का? दक्षिण भारतात एक असं ठिकाण आहे, ज्याला त्याच्या अफाट सौंदर्यामुळे 'भारताचे स्कॉटलँड' असं म्हटलं जातं.

हे ठिकाण म्हणजे कर्नाटक राज्यातील 'कूर्ग'. निसर्गाची मुक्त उधळण, कॉफीचा सुगंध आणि डोंगरदऱ्यांनी वेढलेलं हे हिल स्टेशन उन्हाळ्याच्या सुट्टीत फिरण्यासाठी सर्वोत्तम मानलं जातं.

उन्हाळ्यात जेव्हा उत्तर भारतात उष्णतेची लाट असते, तेव्हा मार्च ते जून दरम्यान कूर्गचे तापमान साधारण १५°C ते ३५°C च्या दरम्यान असते. येथील थंड झुळूक आणि अधूनमधून होणारा हलका पाऊस पर्यटकांना मोठा दिलासा देतो. मान्सूनच्या तुलनेत या काळात गर्दी थोडी कमी असल्याने तुम्ही शांततेत निसर्गाचा आनंद घेऊ शकता.

कूर्गमध्ये मडिकेरी शहरापासून जवळच असलेला अब्बी फॉल्स हा धबधबा पर्यटकांचे मुख्य आकर्षण आहे. चोहोबाजूंनी असलेल्या हिरवळीतून कोसळणारा हा पांढराशुभ्र धबधबा मन प्रसन्न करतो. इथेच राजाची सीट हे एक सुंदर उद्यान आणि व्ह्यू पॉइंट आहे. असे म्हणतात की कोडागुचे राजे येथे बसून सूर्योदय आणि सूर्यास्ताचा आनंद घेत असत.

जर तुम्हाला प्राण्यांची आवड असेल, तर दुबारे एलिफंट कॅम्प येथे तुम्ही हत्तींना आंघोळ घालताना पाहू शकता किंवा त्यांच्यासोबत वेळ घालवू शकता. कावेरी नदीचे उगमस्थान म्हणून ओळखले जाणारे तळकावेरी हे धार्मिक स्थळ ब्रह्मगिरी डोंगरावर वसलेले आहे.

कूर्ग हे भारताचे 'कॉफी हब' मानले जाते. येथील कॉफीच्या बागांमध्ये फिरण्याचा अनुभव काही वेगळाच असतो. तुम्ही येथे कॉफी तयार करण्याची प्रक्रिया जवळून पाहू शकता. खाण्यापिण्याची आवड असेल तर येथील 'पंडी करी', 'अक्की रोटी' आणि सुप्रसिद्ध 'कूर्ग कॉफी'ची चव घ्यायला विसरू नका.

ज्यांना ट्रेकिंगची आवड आहे, त्यांच्यासाठी कूर्गमध्ये ताडीकोलू आणि कोटबेट्टा सारखी आव्हानात्मक शिखरे आहेत. तसेच बारापोल नदीमध्ये तुम्ही रिवर राफ्टिंगचा आनंदही घेऊ शकता.