तुमचे'पॅन कार्ड'बंद झाले आहे का? ही ट्रिक वापरून असे तपासा

अनेकांना आपले 'पॅन कार्ड' सुरू आहे की नाही? याची स्थिती माहिती नसते. निष्क्रिय पॅन कार्ड वापरल्याने बँक खाते गोठवणे, मोठा दंड किंवा कायदेशीर कारवाई यासारख्या गंभीर अडचणी येऊ शकतात.

लोक अनेकदा आधार, मतदार ओळखपत्र आणि ड्रायव्हिंग लायसन्स सारख्या ओळखपत्रांचा वापर अनेक ठिकाणी करतात. या कागदपत्रांचा वारंवार वापर केल्याने आपल्याला त्यांच्या सक्रिय स्थितीची माहिती घ्यायला मदत होते.

ज्यावेळी 'पॅन कार्ड'चा विचार केला जातो तेव्हा ते फक्त आर्थिक कारणांसाठी वापरले जातात, त्यामुळे बहुतेक लोकांना त्यांचे पॅन कार्ड सक्रिय आहे की नाही हे माहित नसते.

काही प्रकरणांमध्ये, हे कार्ड निष्क्रिय किंवा बंद देखील होऊ शकते आणि अशा पॅन कार्डचा वापर केल्याने मोठ्या अडचणी येऊ शकतात. यामुळे तुमचे बँक खाते गोठवले जाऊ शकते किंवा तुम्हाला मोठा दंड आणि कायदेशीर कारवाईला सामोरे जावे लागू शकते.

म्हणून, दर काही दिवसांनी तुमच्या 'पॅन कार्ड'ची स्थिती तपासणे महत्वाचे आहे. आपल्याला फक्त एका क्लिकवर सरकारी पोर्टलवर तुमच्या पॅन कार्डची स्थिती तपासता येते.

तुमच्या पॅन कार्डचे स्टेट्स तपासणे सोपे आहे. यासाठी तुम्हाला अॅपचीही आवश्यकता नाही. तुम्ही तुमच्या फोन किंवा लॅपटॉपच्या ब्राउझरमध्ये हे करु शकता.

तुमच्या फोनवर आयकर विभागाची अधिकृत वेबसाइट उघडा. यानंतर होमपेजवरील 'व्हेरिफाय युअर पॅन' पर्यायावर क्लिक करा. आता पॅन क्रमांक, पूर्ण नाव, जन्मतारीख आणि मोबाईल क्रमांक यासारखे आवश्यक तपशील यामध्ये भरा.

तुमच्या मोबाईलवर आलेला ओटीपी येथे भरा. तुमचा पॅन सक्रिय आहे, निष्क्रिय आहे की अवैध आहे हे लगेच स्क्रीनवर दिसेल.