Corona Vaccination: ...तसा कोणताच अर्ज मिळालेला नाही; कोविशील्डसाठी युरोपचे दरवाजे बंदच?

Corona Vaccination: कोविशील्डला अद्याप तरी युरोपियन युनियनमध्ये परवानगी नाही

देशात आलेली कोरोनाची दुसरी लाट हळूहळू ओसरत आहे. देशात सध्या दररोज ५० हजारांहून कमी कोरोना रुग्णांची नोंद होत आहे. मात्र तिसऱ्या लाटेचा धोका कायम आहे.

तिसऱ्या लाटेचा धोका टाळण्यासाठी लसीकरण अभियानाला गती देण्याची गरज आहे. लसीकरण अभियानात कोविशील्ड आणि कोवॅक्सिनचा सर्वाधिक वापर होत आहे. या दोन्ही लसी भारतातच तयार झाल्या आहेत.

कोविशील्ड लस सीरमनं तयार केली आहे. सीरमची उत्पादन क्षमता अतिशय जास्त असल्यानं देशातील बहुतांश जणांना कोविशील्ड लस मिळाली आहे. मात्र युरोपमध्ये सीरमच्या अडचणी वाढल्या आहेत.

सीरमनं अद्याप त्यांच्या लसीच्या वापरासाठी आमच्याकडे कोणताही परवानगी अर्ज केला नसल्याचं युरोपियन मेडिसिन्स एजन्सीनं (ईएमए) सांगितलं आहे. युरोपमध्ये औषधं वापरासाठीची परवानगी ईएमएकडून दिली जाते.

युरोपियन युनियनमध्ये कोविशील्ड लसीचा वापर करायचा असल्यास लस निर्मात्यांना ईएमएकडे परवानगीसाठी अर्ज करावा लागतो, असं ईएमएनं पत्रकार परिषदेत सांगितलं.

आतापर्यंत ईएमएनं फायझर बायोटेकच्या कॉमिर्नटी, मॉडर्नाची स्पाईकवॅक्स, ऍस्ट्राझेनेकाची वॅक्सझेवरिया आणि जॉन्सन अँड जॉन्सनची जॅन्सेन या लसींना परवानगी दिली आहे. त्यामुळे युरोपियन युनियनमध्येया लसींचा वापर सुरू आहे.

ईएमएकडून कोविशील्डच्या लसीला महिन्याभरात परवानगी मिळेल, असा विश्वास सीरमचे मुख्य कार्यकारी अधिकारी अदर पुनावाला यांनी व्यक्त केला.

आम्ही ऍस्ट्राझेनेकाच्या मदतीनं कोविशील्ड लसीची निर्मिती केली. त्यामुळे त्यांच्या माध्यमातून आम्ही ईएमएकडे अर्ज करू. ईएमएची भूमिका योग्यच आहे, असं पुनावाला म्हणाले.

ईएमएनं परवानगी दिल्यास कोविशील्ड लसीचा वापर युरोपियन युनियनमध्ये सुरू होईल. ब्रिटनमधील ऑक्सफर्ड विद्यापीठ आणि ऍस्ट्राझेनेका कंपनीनं कोरोना लसीवर संधोधन केलं. या लसीचं उत्पादन करण्याची जबाबदारी सीरमकडे आहे.