०१ डिसेंबरला रेल्वे नियम बदलणार! तत्काळ तिकिटासाठी लागणार OTP; मुंबईतील ‘या’ ट्रेनपासून सुरू

Indian Railway Tatkal Ticket Rule Changes: तत्काळ तिकिटांच्या नियमांत भारतीय रेल्वेने एक मोठा बदल केला आहे. सविस्तर जाणून घ्या...

Indian Railway Tatkal Ticket Rule Changes: प्रवाशांच्या सोयी, सुविधा वाढाव्यात, प्रवाशांना सुलभ प्रक्रियेतून तिकीट तसेच अन्य सेवा मिळाव्यात, भारतीय रेल्वेकडून दिल्या जाणाऱ्या सोयी, सुविधा, सेवा या अधिक पारदर्शी असाव्यात, यासाठी भारतीय रेल्वे नियमात, प्रक्रियेत बदल करत असते. रेल्वेच्या तिकिटांबाबत अलीकडे प्रवाशांच्या तक्रारी सातत्याने वाढत चालल्याचे पाहायला मिळत आहे.

रेल्वेची तिकीट बुकिंग प्रणाली अधिक पारदर्शी आणि प्रवासी सुलभ व्हावी, यासाठी भारतीय रेल्वेकडून अनेकदा सर्व रेल्वे मंडळांना मार्गदर्शक सूचना जारी केल्या जातात. तत्काळ तिकिटाच्या संदर्भातही रेल्वेने अनेक बदल केले आहेत. यातच ०१ डिसेंबर २०२५ पासून तत्काळ तिकिटाच्या संदर्भात एक मोठा बदल पश्चिम रेल्वे आणत आहे.

रेल्वे बोर्डाने जारी केलेल्या मार्गदर्शक तत्वांनुसार पश्चिम रेल्वे तत्काळ बुकिंग सिस्टीममध्ये एक महत्त्वाचा बदल करणार आहे. तत्काळ तिकिटे आता सिस्टम-जनरेटेड वन टाइम पासवर्ड (OTP) च्या प्रमाणीकरणानंतरच जारी केली जातील.

हा OTP प्रवाशाने बुकिंगच्या वेळी दिलेल्या मोबाइल नंबरवर पाठवला जाईल आणि OTP यशस्वीरित्या पडताळणी केल्यानंतरच तिकिट जारी केले जाईल.

पश्चिम रेल्वेचे मुख्य जनसंपर्क अधिकारी विनीत अभिषेक यांनी जारी केलेल्या प्रेस रिलीजनुसार, ओटीपी-आधारित तत्काळ प्रमाणीकरण प्रणाली ०१ डिसेंबर २०२५ रोजी लागू केली जाईल. सुरुवातीला ट्रेन क्रमांक १२००९/१२०१० मुंबई सेंट्रल - अहमदाबाद शताब्दी एक्सप्रेसला लागू होईल.

ही नवीन प्रणाली संगणकीकृत पीआरएस काउंटर, अधिकृत एजंट, आयआरसीटीसी वेबसाइट आणि आयआरसीटीसी मोबाईल अॅपद्वारे केलेल्या तत्काळ बुकिंगसाठी लागू असेल. या बदलाचा उद्देश पारदर्शक तत्काळ बुकिंग सुनिश्चित करणे आणि खऱ्या प्रवाशांना तत्काळ तिकिटांची चांगली उपलब्धता सुनिश्चित करणे आहे.

प्रवाशांना ओटीपी पडताळणी प्रक्रिया सुरळीतपणे पूर्ण करण्यासाठी बुकिंगच्या वेळी एक वैध, सुलभ मोबाइल नंबर प्रदान करण्याचा सल्ला देण्यात येत आहे. पश्चिम रेल्वे सर्व प्रवाशांना या महत्त्वाच्या बदलाची नोंद घेण्याचे आवाहन करते.

दरम्यान, १ ऑक्टोबर २०२५ पासून आरक्षण सुरू झाल्यानंतर ज्या लोकांची आधार कार्ड पडताळणी झाले आहे, तेच पहिल्या १५ मिनिटांसाठी ऑनलाइन तिकीट बुक करू शकतील. हा नियम आयआरसीटीसी वेबसाइट आणि मोबाईल अॅप दोन्हीवर लागू झाला आहे.

रेल्वेने ०१ जुलैपासून तात्काळ तिकीट बुकिंगसाठी आधार वेरिफिकेशन आवश्यक केले होते. आता रेल्वेचे तिकीट आरक्षित करण्यासाठी आधार वेरिफिकेशन आवश्यक केले. रेल्वेचा हा निर्णय तिकीट बुकिंग सुरु झाल्यानंतर सामान्य प्रवाशांना तिकीट बुक करता यावे यासाठी करण्यात आला.