EVM बाबत मविआच्या उमेदवारांचा अर्ज मागे; पण भाजपच्या बड्या नेत्याने अर्ज ठेवला कायम!

1 / 6

राहुरी मतदारसंघातील शरद पवार गटाचे प्राजक्त तनपुरे यांनी ईव्हीएम पडताळणीचा अर्ज मागे घेतल्यानंतर संगमनेर मतदारसंघातून काँग्रेसचे बाळासाहेब थोरात व अहमदनगर शहर मतदारसंघातून शरद पवार गटाचे अभिषेक कळमकर यांनीही जिल्हा निवडणूक शाखेला अर्ज देत माघार घेतली आहे.

2 / 6

विधानसभा मतदारसंघातील दुसऱ्या व तिसऱ्या क्रमांकाची मते घेतलेल्या उमेदवारांना मतदानाविषयी शंका असल्यास सात दिवसांत ईव्हीएम व्हीव्हीपॅट पडताळणीसाठी निवडणूक आयोगाकडे अर्ज करतो येतो.

3 / 6

३० नोव्हेंबरपर्यंत जिल्ह्यातून १० उमेदवारांनी ७४ ईव्हीएम मशीनबाबत जिल्हा निवडणूक शाखेकडे तक्रार केली होती. यामध्ये बाळासाहेब थोरात यांचा १४ मशीनबाबत आक्षेप होता, तर ३ मशीनबाबत अभिषेक कळमकर यांची तक्रार होती. मागील आठवड्यात प्राजक्त तनपुरे यांनी पाच ईव्हीएमबाबत असलेली तक्रार मागे घेतली होती. त्यांनी २ लाख ३६ हजार रुपये भरले होते.

4 / 6

बाळासाहेब थोरात यांनी १४ मशीनसाठी ६ लाख ६० हजार ८०० रुपये तर अभिषेक कळमकर यांनी 3 मशीनसाठी १ लाख ४१ हजार ६०० रुपये जिल्हा कोषागार विभागात जमा केले होते. आता तिन्ही उमेदवारांना भरलेले शुल्क परत दिले जाणार आहेत.

5 / 6

१३ जानेवारीला प्रशिक्षण- विधानसभा निवडणुकीत आक्षेप घेतलेल्या ईव्हीएम मशीनची मेमरी राज्य निवडणूक आयोगाच्या निर्देशानुसार तपासली जाणार आहे. यासाठी १३ जानेवारीला पुणे येथे आयोजित केलेल्या प्रशिक्षण शिबिरात जिल्हा निवडणूक अधिकारी तथा जिल्हाधिकारी सिद्धाराम सालीमठ सहभाग घेणार आहेत.

6 / 6

सात उमेदवारांचे अर्ज बाकी- शिर्डीतून प्रभावती घोगरे यांचे २, कर्जत-जामखेडमधून प्रा. राम शिंदे यांचे १७, नेवाशातून शंकरराव गडाख यांचे १०, पारनेरमधून राणी लंके यांचे ५, कोपरगावातून संदीप वर्षे यांचे १, पाथर्डी-शेवगावमधून प्रताप ढाकणे यांचे २ व श्रीगोंद्यातून राहुल जगताप यांचे २ अशा सात उमेदवारांचे अर्ज ५२ ईव्हीएम व व्हीव्हीपॅटबाबत बाकी आहेत.