जगातील सगळ्यात महागडी शाळा; वर्षाची फी तब्बल १,१३,७३,७८० रुपये! आहे तरी कुठे नक्की?

Most Expensive School : शिक्षण आता फक्त ज्ञानापुरते मर्यादित राहिले नाही, तर आज ते जीवनशैली आणि प्रतिष्ठेचे प्रतीक बनले आहे.

स्वित्झर्लंडची इन्स्टिट्यूट ले रोझी ही जगातील सर्वात महागडी आणि प्रतिष्ठित बोर्डिंग स्कूल आहे, ज्याची वार्षिक फी १ कोटी रुपयांपेक्षा जास्त आहे.

शिक्षण आता फक्त ज्ञानापुरते मर्यादित राहिले नाही, तर आज ते जीवनशैली आणि प्रतिष्ठेचे प्रतीक बनले आहे. अशा परिस्थितीत, जर एखाद्या शाळेची फी १ कोटी रुपयांपेक्षा जास्त असेल, तर तुम्हाला प्रश्न पडेल की, येथे कोणत्या प्रकारच्या विशेष सुविधा आणि शिक्षण उपलब्ध असेल.

स्वित्झर्लंडमधील रोले शहरात असलेले इन्स्टिट्यूट ले रोझी हे जगातील सर्वात महागडे आणि प्रतिष्ठित बोर्डिंग स्कूल मानले जाते. या ठिकाणी दरवर्षी काही मोजक्याचं मुलांना प्रवेश दिला जातो.

या शाळेची स्थापना १८८० मध्ये पॉल-एमिल कॉर्नेल यांनी केली होती. याला 'स्कूल ऑफ किंग्ज' असेही म्हणतात. शाळेच्या असाधारण इतिहासामुळे आणि प्रतिष्ठेमुळे, अनेक संस्थाने आणि देशांच्या राजघराण्यातील मुलांनी येथे शिक्षण घेतले आहे.

अहवालांनुसार, या शाळेची वार्षिक फी सुमारे १,१३,७३,७८० रुपये म्हणजेच १ कोटी १४ लाख रुपयांपेक्षा जास्त आहे. फीमध्ये हॉस्टेल, जेवण, अभ्यास तसेच संगीत, खेळ, घोडेस्वारी यासारख्या अनेक अतिरिक्त क्रियाकलापांचा समावेश आहे.

या शाळेत सुमारे ६० देशांतील एकूण ४५० विद्यार्थी शिक्षण घेतात. येथे सुमारे १२० शिक्षक शिकवतात, म्हणजेच प्रत्येक ३ किंवा ४ विद्यार्थ्यांमागे एक शिक्षक असतो.

इन्स्टिट्यूट ले रोझी येथे मुलांना इंटरनॅशनल बॅकलॅरिएट (IB) आणि फ्रेंच बॅकलॅरिएट सारखे उत्कृष्ट अभ्यासक्रम शिकायला मिळतात. आधुनिक सुविधांनी सुसज्ज वर्ग, विशाल क्रीडा संकुल, स्विमिंग पूल, टेनिस कोर्ट यासारख्या सुविधा विद्यार्थ्यांच्या शारीरिक आणि मानसिक विकासात मदत करतात.

ही शाळा उन्हाळ्यात रोले शहरात आहे आणि हिवाळ्यात गस्टाड या रिसॉर्टमध्ये त्यांचे शिक्षण सुरू ठेवते. गस्टाड कॅम्पस विशेषतः स्नोबोर्डिंग, स्कीइंग आणि आइस हॉकीसारख्या हिवाळी खेळांसाठी प्रसिद्ध आहे.

महागडे वार्षिक शुल्क असूनही या शाळेची संपूर्ण जगात स्वतःची ओळख आहे. दरवर्षी फक्त काही निवडक विद्यार्थ्यांनाच येथे प्रवेश मिळतो, ज्यामुळे इथल्या शिक्षणाचा स्तर खूप उच्च राहतो.