घरातील ऑफिसमध्ये बसून देशाच्या सुरक्षेचा आढावा घेत होते, खामेनेईंच्या ऑफिसवर अचूक निशाणा; इराणच्या सर्वोच्च नेत्याचा मृत्यू कसा झाला?

इराणचे सर्वोच्च नेते अयातुल्ला खामेनी हे तेहरानमधील त्यांच्या कार्यालयात इस्रायली-अमेरिकन हल्ल्यात मारले गेले.

इस्रायली-अमेरिकेच्या इराणवरील हल्ल्यात सर्वोच्च नेते अयातुल्ला खामेनेई यांचे निधन झाले आहे. त्यांच्या निधनाची माहिती इराणी माध्यमांनी दिली. शनिवारी इस्रायली-अमेरिकेने इराणची राजधानी तेहरानवर हल्ला केला तेव्हा खामेनेई त्यांच्या कार्यालयात उपस्थित होते.

ज्यावेळी इस्रायली-अमेरिकेने तेहरानमधील खामेनेई यांच्या कंपाऊंडवर क्षेपणास्त्रे टाकण्यास सुरुवात केली तेव्हा ते त्यांच्या निवासस्थानी असलेल्या कार्यालयात बसले होते. या हल्ल्यात खामेनेई यांच्या कुटुंबातील सदस्यांनाही आपले प्राण गमवावे लागले. दरम्यान, इराणी सरकारने ४० दिवसांचा राजकीय शोक जाहीर केला आहे.

इराणचे सर्वोच्च नेते अयातुल्ला खामेनेई, त्यांची मुलगी, जावई आणि नात यांच्यासह त्यांचेही निधन झाल्याचे वृत्त आहे. इस्रायलचे पंतप्रधान नेतन्याहू आणि अमेरिकेचे अध्यक्ष ट्रम्प यांनी आदल्या रात्रीच खामेनेई यांचे निधन झाल्याचा दावा केला होता.

इराणच्या फार्स न्यूज एजन्सीच्या वृत्तानुसार, इराणचे सर्वोच्च नेते अयातुल्ला खामेनेई शनिवारी सकाळी त्यांच्या गृह कार्यालयात बसले होते. इस्रायल आणि अमेरिका हल्ला करणार आहेत याची खामेनेई यांना कल्पना नव्हती.

इस्रायल आणि अमेरिकेला खामेनेई कुठे आहेत हे माहित होते, म्हणून त्यांच्या गृह कार्यालयाजवळ आणि इराणी राष्ट्रपती राजवाड्याजवळ क्षेपणास्त्रे डागण्यात आली. क्षेपणास्त्रे पडली तेव्हा खामेनेई त्यांच्या घरातील कार्यालयात बसले होते. त्यावेळी अमेरिका आणि इस्त्रायल लष्कराने हल्ला केला.

इराणचे सर्वोच्च नेते खामेनेई यांच्या निधनानंतर, इराणी सैन्य, इस्लामिक रिव्होल्यूशनरी गार्ड कॉर्प्सकडून एक निवेदनही समोर आले आहे. इराणी सैन्याने म्हटले आहे की, "आम्ही एक महान नेता गमावला आहे आणि आम्ही त्यांच्यासाठी शोक व्यक्त करतो. त्यांच्या आत्म्याच्या पवित्रते, श्रद्धेची ताकद, गोष्टींमध्ये दूरदृष्टी, अत्याचारी लोकांसमोर धैर्य दाखवले होते.

त्यांच्या हौतात्म्यामुळे आम्हाला अधिक बळकटी मिळेल. आम्ही खामेनेईंच्या मृत्युचा बदला घेऊ. अल्लाहच्या मार्गात मृत्युमुखी पडलेल्यांना मृत समजू नका, तर ते त्यांच्या प्रभूजवळ जिवंत आहेत, असंही या निवेदनात म्हटले आहे.

इराणी सैन्याने पुढे म्हटले आहे की, "इस्लामिक रिव्होल्यूशनरी गार्ड कॉर्प्स, इस्लामिक रिपब्लिकचे सशस्त्र दल आणि विशाल पीपल्स बासीज आमच्या नेत्याच्या मौल्यवान वारशाचे पूर्ण ताकदीने रक्षण करत राहतील, त्यांच्या मार्गदर्शकाच्या मार्गाचे अनुसरण करतील आणि देशाविरुद्धच्या अंतर्गत आणि बाह्य कटांना तोंड देण्यासाठी आणि आक्रमणकर्त्यांना धडा शिकवण्यासाठी दृढ राहतील."