चीनचं नवं छुपं शस्त्र कबुतर! मेंदूत चिप, पाठीवर कॅमेरा घेऊन शत्रू देशांत करतोय हेरगिरी

'कबुतर जा जा जा' हे हिंदी चित्रपटांतील गाणे अतिशय प्रसिद्ध आहे. पण, याच कबुतराला हेरगिरी करण्यासाठी अत्याधुनिक तंत्रज्ञानाद्वारे आज्ञा दिली जात असेल, तर त्या गोष्टींचे परिमाणच बदलते.

चीनमधील एका कंपनीने कबुतरांच्या मेंदूत इलेक्ट्रॉनिक चीप बसवून त्यांचा मागोवा घेण्याचे व त्यांचे उड्डाण नियंत्रित करण्याचे महत्त्वाचे काम केले.

त्यामुळे पाठीवर छोटचा आकाराचे कॅमेरे लावलेली ही कबुतरे शत्रू देशांच्या हद्दीत पाठवून तेथील माहिती गोळा करण्यासाठी अतिशय उपयोगी ठरणार आहेत. हे पक्षी कॅमेरासह उड्डाण करताना सिग्नलने दर्शविलेल्या मार्गानेच उड्डाण करतात. 

चाचणीही यशस्वी - 'फॉजन-१' या न्यूरोटेक्नॉलॉजी कंपनीने हे तंत्रज्ञान विकसित केले आहे. त्याची चाचणीही यशस्वी झाली आहे. ही कंपनी कबुतरांच्या मेंदूत बसविलेल्या चीपद्वारे त्यांना विशिष्ट सिग्नल पाठविते.

एका दिवसात कबुतर करू शकते ५०० किमी उड्डाण - हेरगिरीसाठी वापरण्यात येणारी ही कबुतरे एका दिवसात सुमारे ५०० किमी उड्डाण करू शकतात. रात्रीदेखील ते उड्डाण करू शकत असल्याने शत्रूच्या नकळत त्याच्या प्रदेशात प्रवेश करू शकतात.

युद्धाप्रसंगी ही कबुतरे मोलाची कामगिरी बजावू शकतात. आकार लहान असल्याने व उड्डाण करताना आवाज होत नसल्याने शत्रूच्या प्रदेशात त्यांच्यामार्फत टेहळणी करणे सुलभ आहे. ही कबुतरे काम झाल्यानंतर पुन्हा आपल्या मूळ जागी येतात.

चिपद्वारे मेंदूला दिल्या जातात आज्ञा - कबुतरांच्या उड्डाणावर नियंत्रण राखणारा ऑपरेटर एका खास प्रणालीद्वारे त्यांच्या मेंदूतील विशिष्ट भागांना इलेक्ट्रिक सिग्नल पाठवितो. त्यामुळे या पक्ष्याला कुठल्या दिशेला उडायचे याचे दिशादिग्दर्शन होते.

ही प्रणाली तयार करणाऱ्या चिनी कंपनीच्या संशोधकांनी सांगितले की, या प्रकारे त्या कबुतराला हव्या त्या ठिकाणी पोहचविता येते. चीनचे संरक्षण खाते व गुप्तचर संस्था या तंत्रज्ञानाचा वापर करण्याची योजना आखत असल्याची चर्चा आहे.

काही महिन्यांपूर्वी चिनी वैज्ञानिकांनी एक मिलिट्री ड्रोन तयार केले आहे. या ड्रोनची साईज आणि आकार एका मच्छरासारखा आहे. मच्छरच्या आकाराचे हे ड्रोन युद्धाच्या मैदानात विध्वंस करण्यासाठी सज्ज आहेत.

चिनी वैज्ञानिकांनी त्यांच्या मिलिट्री ऑपरेशनसाठी मच्छरच्या आकाराचे एक खूप लहान ड्रोन तयार केले आहे. हे माइको ड्रोन नॅशनल युनिवर्सिटी ऑफ डिफेन्स टेक्नोलॉजीच्या रोबोटिक्स प्रयोगशाळेत विकसित करण्यात आले आहे. जे मध्य चीनच्या हुनान प्रांतात आहे