३ मिनिटांत तुटलेली हाडे जोडता येणार; चीनच्या नवीन 'बोन ग्लू'ने रुग्णांना मोठा दिलासा

World's First Bone Glue : अपघातामुळे हाडे फ्रॅक्चर झाली तर ती बरी होण्यासाठी महिने लागतात. पण आता चिनी शास्त्रज्ञांनी जगातील पहिला 'बोन ग्लू' तयार केला आहे जो फक्त ३ मिनिटांत तुटलेली हाडे जोडू शकतो.

चिनी शास्त्रज्ञांनी असा दावा केला आहे की त्यांनी एक ग्लू तयार केला आहे जो फक्त ३ मिनिटांत तुटलेली हाडे जोडू शकतो. या हाडांच्या ग्लूला 'बोन-२' असे नाव देण्यात आले आहे. या शोधामुळे हाडे जोडण्यासाठी हाडांसोबत रॉड वापरण्याची गरज लागणार नाही.

लिन जियानफेंग आणि त्यांच्या टीमने पूर्व चीनमधील झेजियांग प्रांतात हा ग्लू विकसित केला आहे. लिन हे सर रन रन शॉ हॉस्पिटलमध्ये असोसिएट चीफ ऑर्थोपेडिक सर्जन आहेत. त्यांनी दावा केला की हा 'हाडांचा ग्लू' दोन ते तीन मिनिटांत तुटलेल्या हाडाला जोडू शकतो.

हा ग्लू शरीराच्या रक्ताने भरलेल्या भागांनाही घट्ट चिकटतो आणि हा पूर्णपणे 'जैवसुरक्षित' म्हणजेच शरीरासाठी सुरक्षित आहे. या हाडांच्या ग्लूची चिकटण्याची ताकद २०० किलोग्रॅमपेक्षा जास्त आहे.

या हाडांच्या ग्लूची १५० हून अधिक रुग्णांवर यशस्वी चाचणी घेण्यात आली आहे. आतापर्यंत, स्टीलचे रॉड आणि स्क्रू घालण्यासाठी मोठी चीर पाडावी लागत होती. पण या 'बोन-२' चे आणखी एक वैशिष्ट्य म्हणजे ते धातूच्या रॉडप्रमाणे शरीरात कायमचे राहत नाही. हाड बरे झाल्यानंतर, ते ६ महिन्यांत शरीरात विरघळते, ज्यामुळे दुसऱ्या शस्त्रक्रियेची आवश्यकता नाही.

लिन जियानफेंग यांनी सांगितले की त्यांनी पाण्याखाली ऑयस्टर पाहिले, जे एका पुलाला घट्ट चिकटलेले होते. समुद्रात राहणारे ऑयस्टर खडकांना चिकटून राहण्यासाठी एक विशेष प्रकारचा चिकट पदार्थ तयार करतात. लिन यांना वाटले की जर ऑयस्टर पाण्याच्या आत इतके मजबूतपणे चिकटू शकतात, तर तुटलेली हाडे देखील रक्तात जोडली जाऊ शकतात आणि यातूनच त्यांना हाडांचा ग्लू बनवण्याची प्रेरणा मिळाली.

२०१६ मध्ये जेव्हा ते निवासी डॉक्टर होते तेव्हा त्यांनी पाहिले की सर्वात अनुभवी सर्जननाही तुटलेल्या हाडांचे तुकडे दुरुस्त करण्यासाठी ऑपरेशन रूममध्ये तासनतास घालवावे लागत होते. त्याचे परिणाम अनेकदा इतके चांगले नसत, असेही डॉक्टर लिन म्हणाले.

दरवर्षी जगभरात लाखो लोकांना हाडांच्या फ्रॅक्चरचा त्रास होतो. पारंपारिक पद्धती महागड्या आणि वेदनादायक असतात. मेटल इम्प्लांटमुळे संसर्ग किंवा दुसरी शस्त्रक्रिया होण्याचा धोका असतो, पण 'बोन ग्लू' हा या समस्येवर उपाय आहे.