PPF गुंतवणुकीसाठी ५ तारीख का आहे महत्त्वाची? जाणून घ्या व्याजाचं संपूर्ण गणित, परताव्यावर होतो परिणाम
By ऑनलाइन लोकमत | Updated: April 4, 2026 09:47 IST2026-04-04T09:39:29+5:302026-04-04T09:47:54+5:30
PPF Investment News: पीपीएफ म्हणजेच पब्लिक प्रोव्हिडंट फंडमध्ये गुंतवणूक करताना महिन्याची ५ तारीख अत्यंत महत्त्वाची मानली जाते. पाहा काय आहे यामागचं कारणं?
PPF Investment News: पीपीएफ म्हणजेच पब्लिक प्रोव्हिडंट फंडमध्ये गुंतवणूक करताना महिन्याची ५ तारीख अत्यंत महत्त्वाची मानली जाते. याचं मुख्य कारण असं की, पीपीएफ खात्यावर मिळणारं व्याज दर महिन्याच्या ५ तारखेपासून ते महिन्याच्या शेवटच्या दिवसापर्यंतच्या किमान शिल्लक रकमेच्या आधारावर ठरवलं जातं.
सोप्या भाषेत सांगायचं तर, जर एखाद्या गुंतवणूकदारानं महिन्याच्या ५ तारखेनंतर आपल्या पीपीएफ खात्यात पैसे जमा केले, तर त्याला त्या अतिरिक्त रकमेवर त्या महिन्याचं व्याज मिळत नाही. याचाच अर्थ असा की उशिरा गुंतवणूक केल्यास थेट व्याजाचं नुकसान सोसावं लागतं.
समजा तुम्ही तुमच्या पीपीएफ खात्यात १.५ लाख रुपयांची गुंतवणूक करत आहात. जर ही रक्कम तुम्ही ५ एप्रिल २०२६ किंवा त्यापूर्वी जमा केली, तर ही संपूर्ण रक्कम त्या महिन्याच्या व्याजाच्या गणनेत समाविष्ट केली जाईल. अशा परिस्थितीत मार्च २०२७ पर्यंत तुम्हाला संपूर्ण वर्षाचं व्याज मिळेल.
सध्याच्या ७.१% व्याजदरानुसार, १,५०,००० रुपयांवरील वार्षिक व्याज १०,६५० रुपये होतं, म्हणजेच महिन्याचे व्याज ८८७.५० रुपये इतके भरतं. परंतु, जर तुम्ही ही रक्कम ५ एप्रिलनंतर जमा केली, तर तुम्हाला त्या पहिल्या महिन्याचे व्याज मिळणार नाही, ज्यामुळे तुमचं वार्षिक व्याज ९,७६२.५० रुपये इतकेच राहील.
केवळ काही दिवसांचा उशिर झाल्यास तुम्हाला ८८७.५० रुपयांचं नुकसान सहन करावं लागू शकतं. म्हणूनच तज्ज्ञ असा सल्ला देतात की, पीपीएफमध्ये गुंतवणूक नेहमी महिन्याच्या ५ तारखेला किंवा त्यापूर्वीच करावी, जेणेकरून प्रत्येक महिन्याचं पूर्ण व्याज मिळून गुंतवणुकीवर जास्तीत जास्त परतावा मिळेल.
जर तुम्हाला पीपीएफमध्ये वर्षभराचा पूर्ण फायदा घ्यायचा असेल, तर आर्थिक वर्षाच्या सुरुवातीलाच एकरकमी रक्कम जमा करणं फायद्याचं ठरतं. यामुळे तुमच्या संपूर्ण रकमेवर वर्षभराचं व्याज मिळतं आणि परतावा वाढतो.
याव्यतिरिक्त, नियमित मासिक गुंतवणूक सुरू ठेवणं देखील फायदेशीर ठरतं. वेळेवर गुंतवणूक सुनिश्चित करण्यासाठी इंटरनेट बँकिंग हा एक उत्तम पर्याय आहे. याद्वारे तुम्ही दरमहा सहजपणे आणि वेळेवर तुमच्या पीपीएफ खात्यात पैसे जमा करू शकता, ज्यामुळे विलंब होण्याची शक्यता कमी होते आणि व्याजाचे नुकसान टाळता येतं.