व्यवसायातही कोहलीची 'विराट' कामगिरी; फक्त टॅक्सच ६६ कोटींचा भरला; नेटवर्थ किती असेल?

Virat Kohli Net Worth : जगातील सर्वात श्रीमंत क्रिकेटपटूंमध्ये विराट कोहलीच्या नावाचा समावेश आहे. विराट कोहलीने क्रिकेट ब्रँडच्या जाहिराती आणि गुंतवणुकीतून खूप कमाई केली आहे.

हिटमॅन रोहित शर्मानंतर चेस मास्टर विराट कोहलीनेही कसोटी क्रिकेटमधून निवृत्तीची घोषणा केली आहे. विराट कोहली फक्त क्रिकेटच्या मैदानावरच चांगला खेळत नाही. तर व्यवसायतही तो खूप पुढे गेला आहे. जगातील सर्वाधिक कमाई करणाऱ्या क्रिकेटपटूंमध्ये त्याचे नाव समाविष्ट आहे.

विराट कोहली क्रिकेट, ब्रँड प्रमोशन आणि व्यवसायातून खूप कमाई करतो. त्यांची एकूण संपत्ती १०५० कोटी रुपये असल्याचा अंदाज आहे. २०२४ मध्ये, कोहलीने ६६ कोटी रुपयांचा आगाऊ कर भरला, ज्यामुळे तो सर्वाधिक कर भरणारा क्रिकेटपटू बनला.

विराट कोहलीची एकूण संपत्ती आणि कमाई ही त्याच्या क्रिकेट कारकिर्द, स्मार्ट गुंतवणूक आणि ब्रँड व्हॅल्यूमुळे आहे. त्याच्या व्यावसायिक कौशल्यामुळे आणि सोशल मीडियावरील वापरामुळे तो केवळ क्रिकेटच नव्हे तर व्यावसायिक जगातही एक जागतिक ब्रँड बनला आहे.

विराट कोहली एक आलिशान जीवनशैली जगतो. त्याच्याकडे महागडी घड्याळे, गाड्या आणि घर आहे. विराटची पत्नी अनुष्का शर्मा देखील कोट्यधीश असून तिच्या नावावर एकूण ३०६ कोटी रुपयांची संपत्ती आहे.

विराट कोहली हा बीसीसीआयचा ए+ ग्रेड क्रिकेटपटू आहे. यातून तो दरवर्षी ७ कोटी रुपये कमावतो. विराटला प्रत्येक कसोटी सामन्यासाठी १५ लाख रुपये, एकदिवसीय सामन्यासाठी ६ लाख रुपये आणि टी-२० सामन्यासाठी ३ लाख रुपये मानधन मिळते. आयपीएलमध्ये तो रॉयल चॅलेंजर्स बंगळुरूकडून खेळतो. त्याला प्रत्येक हंगामात १५-१७ कोटी रुपये मिळतात. एकूणच, तो फक्त क्रिकेटमधून दरवर्षी सुमारे २५ कोटी रुपये कमावतो.

कोहली सुमारे ४० ब्रँड्सचा प्रचार करतो. प्यूमा, ऑडी, एमआरएफ, पेप्सी, मान्यवर, विवो आणि मंत्रा हे काही मोठे ब्रँड आहेत. ज्यांच्या जाहिरातींमध्ये विराट दिसतो. तो प्रत्येक जाहिरातीसाठी १० कोटी रुपयांपर्यंत शुल्क घेतो.

कोहलीने ब्लू ट्राइब, जिम चेन चिसेल फिटनेस, डिजिट इन्शुरन्स, स्पोर्ट्स कॉन्व्हो आणि युनिव्हर्स स्पोर्ट्सबिझ इत्यादी अनेक स्टार्टअप्समध्ये गुंतवणूक केली आहे. विराटचे मुंबईत 'वन८ कम्यून' नावाचे रेस्टॉरंट आहे.

याशिवाय, त्याच्याकडे एफसी गोवा (इंडियन सुपर लीग), टेनिस आणि कुस्ती संघ यांसारखे क्रीडा संघ देखील आहेत. या गुंतवणुकींमधून दरवर्षी मोठा परतावा मिळतो.

विराटकडे अनेक आलिशान घरे आहेत. मुंबईतील वरळी येथे त्यांचे ३४ कोटी रुपयांचे अपार्टमेंट आहे, जे त्यांनी २०१६ मध्ये खरेदी केले होते. गुरुग्राममधील डीएलएफ फेज-१ मध्ये त्यांचा एक आलिशान बंगला आहे, ज्याची किंमत ८० कोटी रुपयांपेक्षा जास्त आहे.

अलिबागमध्ये त्यांची एक हवेली आहे, ज्याची किंमत ३० कोटींपेक्षा जास्त आहे. विराट कोहलीकडे बेंटले कॉन्टिनेंटल जीटी, ऑडी आर८ एलएमएक्स, रेंज रोव्हर वोग, ऑडी क्यू८, ऑडी एस५ सारख्या आलिशान आणि महागड्या गाड्या आहेत.