ट्रम्प टॅरिफमुळे अमेरिकेतच हाहाकार; छोट्या व्यावसायिकांवर टांगती तलवार, स्टॉकही संपला, दिवाळखोर होण्याची भीती

America Trump Tariff: अमेरिकेचे राष्ट्राध्यक्ष डोनाल्ड ट्रम्प हे त्यांच्याच देशातील लहान व्यावसायिकांसाठी अडचणी निर्माण करत असल्याचं चित्र दिसून येत आहे. याचं सर्वात मोठं कारण म्हणजे ट्रम्प यांनी वारंवार बदललेलं आयात शुल्क (टॅरिफ) आहे. ट्रम्प यांच्या टॅरिफमुळे अमेरिकेतील लहान किरकोळ विक्रेत्यांना वर्षाच्या अखेरीस येणाऱ्या सुट्ट्यांच्या काळात वस्तूंच्या पुरवठ्याच्या मोठ्या समस्येचा सामना करावा लागत आहे. अनेक कंपन्यांकडे असलेला स्टॉक जवळपास संपण्याच्या मार्गावर आहे.

न्यूयॉर्कमधील स्लीप वेलनेस ब्रँड लॉफ्टीचे (Loftie) संस्थापक मॅट हॅसेट यांच्यासाठी वर्षाच्या अखेरीस येणाऱ्या सुट्ट्यांचा काळ नेहमीच व्यस्त असायचा. पण यावर्षी, हा काळ अत्यंत अव्यवस्थित झाला आहे. लॉफ्टी त्यांचे सनराईज लॅम्प आणि फोन-फ्री अलार्म क्लॉक चीनमधून आयात करते. परंतु चीनमधून होणाऱ्या आयातीवरील शुल्कानं पुरवठा साखळीवर वाईट परिणाम केला आहे.

"तयारी करणं खूप कठीण झालं आहे. आमच्याकडे खूप कमी स्टॉक शिल्लक आहे. आम्हाला जितकी इन्व्हेंटरी आवश्यक आहे, त्याच्यापैकी फक्त १०% च आमच्याकडे आहे," असं हॅसेट यांनी या आठवड्यात सांगितलं होतं.

ट्रम्प यांनी चीनमधून येणाऱ्या मालावर वारंवार बदललेलं टॅरिफ अमेरिकेतील किरकोळ विक्रेत्यांसाठी मोठी अडचण ठरले आहे. यामुळे लॉफ्टीसारख्या लहान कंपन्यांना एकतर मोठं शुल्क भरावं लागलं आहे किंवा अधिक महागड्या दरात नवीन सप्लायर शोधण्यामध्ये त्या अडकल्या आहेत. नोव्हेंबर आणि डिसेंबर हे महिने साधारणपणे अमेरिकेतील किरकोळ विक्रेत्यांच्या वार्षिक नफ्याचा एक तृतीयांश (One Third) भाग असतात.

एप्रिलच्या मध्यात जेव्हा ट्रम्प यांनी चीनी आयातीवर १८०% पर्यंत टॅरिफची धमकी दिली होती, तेव्हा हॅसेट यांनी उत्पादन थायलंडमध्ये हलवण्याचा विचार केला होता, कारण तिथे शुल्क कमी होतं. परंतु, नंतर चीनवर लागणारे दर २०% पर्यंत कमी करण्यात आलं.

अशा परिस्थितीत २०% जास्त उत्पादन खर्च असलेल्या पर्यायी कारखान्यांमध्ये उत्पादन करणे, टॅरिफ भरण्यापेक्षाही जास्त महाग ठरले. अखेरीस, हॅसेट यांनी त्यांच्या चिनी उत्पादकांसोबत काम चालू ठेवलं. मात्र या अनिश्चिततेमुळे ऑर्डरमध्ये विलंब झाला आणि वर्षातील सर्वात व्यस्त खरेदी हंगामाच्या अगदी आधी त्यांना स्टॉकच्या गंभीर कमतरतेचा सामना करावा लागत आहे.

वॉलमार्ट (Walmart) आणि कॉस्टको (Costco) सारखे मोठे किरकोळ विक्रेते त्यांच्या प्रचंड आकारमानामुळे, लहान कंपन्यांच्या तुलनेत पुरवठ्याचे हे झटके अधिक सहजपणे सहन करू शकतात. बिझनेस ॲनॅलिटिक्स प्रोव्हायडर रॅपिडरटिंग्स (RapidRatings) नुसार, ५० मिलियन डॉलरपेक्षा कमी एकूण मालमत्ता असलेल्या लहान किरकोळ विक्रेत्यांच्या ऑपरेटिंग मार्जिनमध्ये २०.७% ची घट झाली आहे. यामुळे त्यांच्यापैकी ३६% दिवाळखोरीच्या उच्च धोक्यात आहेत, तर मोठ्या किरकोळ विक्रेत्यांमध्ये हा आकडा केवळ १२% आहे.

टॅरिफमुळे निर्माण झालेल्या अनिश्चिततेमुळे काही व्यवसायांनी त्यातून वाचण्यासाठी सुट्ट्यांसाठी मोठी ऑर्डर दिली. परंतु, आता ग्राहकांचा विश्वास सतत कमी होत असल्यामुळे न विकल्या गेलेल्या मालासोबत अडकण्याचा धोका त्यांना आहे. एका डझनहून अधिक लहान अमेरिकन किरकोळ विक्रेत्यांनी खर्चात मोठी वाढ झाल्याचं नमूद केलंय. त्यामुळे काहींनी कॅश वाचवण्यासाठी नोकऱ्यांमध्ये कपात केली आहे किंवा त्यांची प्रोडक्ट रेंज कमी केली आहे.