Success Story: पती-पत्नीनं केली कमाल; छोट्या सुरुवातीतून उभा केला ३३३ कोटींचा व्यवसाय, पाहा काय केलं असं?

Success Story: ही गोष्ट अशा एका जोडप्याची आहे ज्यांनी आपल्या छंदाचं रूपांतर एका मोठ्या व्यवसायात केलं आहे. त्यांनी छोट्या सुरुवातीचं रुपांतर ३३३ कोटी रुपयांच्या ब्रँडमध्ये केलंय.

Success Story: ही गोष्ट अशा एका जोडप्याची आहे ज्यांनी आपल्या छंदाचं रूपांतर एका मोठ्या व्यवसायात केलं आहे. 'ब्लू टोकाई कॉफी रोस्टर्स' असं या ब्रँडचं नाव असून मॅट चितरंजन आणि नम्रता अस्थाना हे त्याचे संस्थापक आहेत.

या पती-पत्नीनंतर शिवम शाही देखील या व्यवसायात सामील झाले. ब्लू टोकाईची सुरुवात २०१३ मध्ये झाली आणि आज हा भारतातील मोठ्या स्पेशालिटी कॉफी ब्रँड्सपैकी एक आहे. हे पती-पत्नी जेव्हा अमेरिकेहून दिल्लीत येऊन स्थायिक झाले, तेव्हा त्यांना भारतात उच्च दर्जाच्या कॉफीची कमतरता जाणवली.

त्यानंतर त्यांनी आपल्या अल्प बचतीतून एक छोटा तैवानी टेबलटॉप रोस्टर खरेदी केला आणि तो नम्रता यांच्या पालकांच्या घरातील एका अतिरिक्त बेडरूममध्ये सेट केला. भारतीय शेतकऱ्यांकडून थेट उच्च दर्जाचे 'अरेबिका बीन्स' घेणं आणि ते घरगुती ग्राहकांसाठी रोस्ट करणं हा त्यांचा मुख्य उद्देश होता. आज या ब्रँडचे देशभरात १५० पेक्षा जास्त कॅफे असून महसूल ३३३ कोटी रुपयांपर्यंत पोहोचलाय.

मॅट चितरंजन आणि नम्रता अस्थाना यांची ही यशोगाथा एका सामायिक आवडीतून सुरू झाली. घरातील एका छोट्या छंदापासून सुरू झालेला हा प्रवास आता एका मल्टी-चॅनेल एंटरप्राइझमध्ये बदलला आहे. या कंपनीनं आर्थिक वर्ष २०२४-२५ मध्ये ५०% वार्षिक वाढीसह ३३२.७ कोटी रुपयांची कमाई केली आहे. या तुलनेत २०२३-२४ मध्ये कंपनीचा महसूल २२१ कोटी रुपये इतका होता.

मॅट चितरंजन, नम्रता अस्थाना आणि शिवम शाही यांनी सुरू केलेला हा ब्रँड प्रामुख्यानं प्रीमियम इंडियन अरेबिका बीन्सची सोर्सिंग, रोस्टिंग आणि रिटेलिंगवर लक्ष केंद्रित करतो. देशभरातील १५० पेक्षा जास्त कॅफेससह या ब्रँडची जपान आणि दुबईमध्येही आंतरराष्ट्रीय उपस्थिती आहे.

या ब्रँडची सुरुवात दिल्लीतील एका रिकाम्या बेडरूममधून एका छोट्या रोस्टरीच्या स्वरूपात झाली होती. ज्या काळात भारतातील बहुतेक प्रीमियम कॉफी निर्यात केली जात असे, त्या काळात या संस्थापकांनी ती भारतीय ग्राहकांपर्यंत पोहोचवण्याचं ठरवलं. 'ब्लू टोकाई' या नावाचा अर्थ 'मोराची पिसे' (टोकाई) असा होतो.

कंपनीचे सह-संस्थापक आणि सीईओ मॅट चितरंजन हे न्यूयॉर्क विद्यापीठातून फायनान्स आणि इकॉनॉमिक्समध्ये शिक्षित असून व्यवसायाला धोरणात्मक आणि ऑपरेशनल दिशा देण्याचं त्यांचं काम आहे. सह-संस्थापक नम्रता अस्थाना यांचा सायकॉलॉजी, डिझाइन आणि कम्युनिकेशनमधील अनुभव ब्रँडची प्रतिमा आणि कॅफेचं सौंदर्य टिकवून ठेवण्यासाठी महत्त्वाचा ठरलाय. त्यांनी ग्राहकांशी पारदर्शक नातं निर्माण करण्यावर भर दिला आहे. इंजिनिअर असलेले तिसरे सह-संस्थापक शिवम शाही यांनी नंतर या टीममध्ये प्रवेश केला. त्यांनी सप्लाय चेन मॅनेजमेंट, कम्प्लायन्स आणि कॅफे नेटवर्कच्या वेगानं होणाऱ्या विस्ताराची जबाबदारी स्वीकारली.