नीरज चोप्राची पत्नी हिमानी मोरचा मोठा निर्णय! टेनिसला कायमचा रामराम, 'या' व्यवसायात घेतली उडी

Neeraj Chopra Wife : ऑलिंपिक चॅम्पियन नीरज चोप्राची पत्नी हिमानी मोर हिने टेनिसला रामराम केला आहे. आता ती पतीचा व्यवसाय सांभाळणार आहे.

ऑलिंपिक चॅम्पियन नीरज चोप्रा याची पत्नी हिमानी मोर हिने आता टेनिसला रामराम केला आहे. एकेकाळी टेनिस कोर्टवर आपली छाप पाडणारी हिमानी आता तिच्या पतीसोबत व्यवसायात मदत करेल. अमेरिकेतील डबल एमबीएची पदवी घेतल्यानंतर तिने हा मोठा निर्णय घेतला आहे.

हिमानीच्या वडिलांनी दिलेल्या माहितीनुसार, मे महिन्यात शिक्षण पूर्ण झाल्यानंतर हिमानीने स्वतःच निर्णय घेतला की ती आता टेनिस खेळणे सोडून देईल. तिने स्पोर्ट्स मॅनेजमेंट आणि एचआरमध्ये डबल एमबीए केले आहे, त्यामुळे आता ती नीरजच्या व्यावसायिक कामांमध्ये त्याला मदत करणार आहे. यात नीरजची ब्रँडिंग, मार्केटिंग आणि इतर क्रीडा संबंधित उपक्रमांचा समावेश असेल.

टोकियो ऑलिंपिकमध्ये सुवर्ण आणि पॅरिस ऑलिंपिकमध्ये रौप्य पदक जिंकल्यानंतर नीरज चोप्राची लोकप्रियता प्रचंड वाढली आहे. मीडिया रिपोर्ट्सनुसार, त्याची ब्रँड व्हॅल्यू आता ३३५ कोटींपेक्षा जास्त झाली आहे. तो ऑडी इंडियासारख्या अनेक मोठ्या ब्रँड्सचा ब्रँड अ‍ॅम्बेसेडर आहे.

नीरजने नुकताच ५ जुलै रोजी बेंगळुरूमध्ये "नीरज चोप्रा भाला फेक" या कार्यक्रमाचे आयोजन केले होते. या कार्यक्रमात हिमानी देखील उपस्थित होती. आता दरवर्षी असे कार्यक्रम आयोजित करण्याची योजना आहे.

मूळची हरियाणातील सोनीपतची असलेली हिमानी, लहानपणापासूनच टेनिस खेळत होती. २०१८ मध्ये तिने व्यावसायिक टेनिसमध्ये पदार्पण केले. ती एकेकाळी महिला दुहेरी रँकिंगमध्ये टॉप-३० मध्ये होती. नंतर पुढील शिक्षणासाठी ती अमेरिकेला गेली, जिथे तिने अभ्यास करतानाच कोच आणि मॅनेजर म्हणूनही काम केले.

जानेवारी २०२५ मध्ये, नीरज आणि हिमानी यांनी हिमाचलमधील सोलन येथे एका खाजगी समारंभात लग्न केले. लग्नानंतर ती नीरजसोबतच आहे.

सध्या नीरज युरोपमध्ये डायमंड लीग आणि वर्ल्ड चॅम्पियनशिपच्या तयारीमध्ये व्यस्त आहे. हिमानी त्याच्यासोबत राहून त्याचे प्रशिक्षण, आहार आणि इतर व्यवस्थापनाची काळजी घेत आहे. आता ती मैदानाबाहेरून नीरजच्या प्रवासाची एक मजबूत साथीदार बनली आहे.