'या' क्षेत्रात भारत अमेरिका-रशिया आणि फ्रान्सच्या पुढे; पाकिस्तानचं तर यादीत नावही नाही

foreign exchange reserves : परकीय चलन साठ्याच्या बाबतीत भारताने जगातील प्रमुख देशांना मागे टाकले आहे. भारत रशिया, अमेरिका आणि फ्रान्ससारख्या देशांपेक्षा पुढे आहे.

भारत आणि पाकिस्तानमधील तणावाच्या पार्श्वभूमीवर युद्धबंदी जाहीर करण्यात आली आहे. पाकिस्तानला हा निर्णय घेण्यास भारताने भाग पाडले. देशाने दाखवून दिले की ते कोणासमोरही झुकणार नाही. भारत आता मोठी अर्थव्यवस्था असलेला देश बनला आहे. अनेक बाबतीत त्याने जगातील विकसित देशांनाही मागे टाकले आहे.

उत्पादन, सेवा क्षेत्रच नाही तर परकीय चलन साठ्यातही भारत आज आघाडीवर आहे. भारताने रशिया, अमेरिका आणि फ्रान्सलाही याबाबतीत मागे टाकले आहे.

चीन, जपान आणि स्वित्झर्लंड नंतर परकीय चलन साठ्याच्या बाबतीत भारत हा जगातील चौथा सर्वात मोठा देश आहे. रशिया, अमेरिका आणि फ्रान्ससारखे देशही भारतापेक्षा खूप मागे आहेत. भारताकडे एकूण परकीय चलन साठा ६८६ अब्ज डॉलर्सपेक्षा जास्त आहे. जे रशिया आणि अमेरिकेसारख्या विकसित देशांपेक्षा खूप जास्त आहे.

चीन या यादीत अव्वल स्थानावर आहे. ३१ ऑक्टोबर २०२४ पर्यंत चीनच्या परकीय गंगाजळीत ३,५७१,८०३ मिलियन डॉलर्स होता. यात जपान दुसऱ्या स्थानावर असून त्यांचा परकीय चलन साठा १,२३८,९५० दशलक्ष डॉलर्स आहे. तर स्वित्झर्लंड ९५२,६८७ दशलक्ष अमेरिकन डॉलर्ससह चौथ्या स्थानावर आहे. हे तिन्ही देश परकीय चलन साठ्याच्या बाबतीत भारतापेक्षा पुढे आहेत. जगातील इतर प्रमुख देशांचे साठे भारतापेक्षा कमी आहेत.

भारताचा परकीय चलन साठा जगातील विकसित देशांपेक्षा जास्त आहे. परंतु, गेल्या आठवड्यात देशाच्या गंगाजळीत घट झाली. २ मे रोजी संपलेल्या आठवड्यात भारताचा परकीय चलन साठा २.०६५ अब्ज अमेरिकन डॉलरने घसरून ६८६.०६४ अब्ज अमेरिकन डॉलरवर आला आहे, असे आरबीआयने शुक्रवारी सांगितले. मागील अहवाल आठवड्यात, एकूण परकीय चलन साठा १.९८३ अब्ज डॉलरने वाढून ६८८.१२९ अब्ज डॉलरवर पोहोचला होता.

विशेष म्हणजे २८ फेब्रुवारी रोजी संपलेल्या आठवड्यानंतर भारताच्या परकीय चलन साठ्यात घट झाली आहे. यापूर्वी, भारताच्या परकीय चलन साठ्यात सलग ८ आठवडे वाढ झाली होती. या काळात भारताच्या परकीय चलन साठ्यात ४९.४३ अब्ज डॉलर्सची वाढ झाली. सप्टेंबर २०२४ च्या अखेरीस, परकीय चलन साठा ७०४.८८५ अब्ज डॉलर्सच्या उच्चांकावर पोहोचला होता. या यादीत पाकिस्तान फारच नीचांकी पातळीवर आहे. त्यांच्यावर कर्ज घेऊन सरकार चालवण्याची वेळ आली आहे.