'या' ४ ठिकाणी पत्नी मिळवून देऊ शकते जबरदस्त नफा; पाहा कोणत्या आहेत या स्कीम्स?

पती-पत्नी आयुष्यातील सर्वच जबाबदाऱ्या एकत्र पार पाडत असतात, मग ती आर्थिक जबाबदारी असली तरी... आजच्या युगात फक्त कमाई करणे पुरेसं नाही, तर ते उत्पन्न योग्य ठिकाणी गुंतवून वाढवणं देखील महत्त्वाचं आहे. जर तुम्ही तुमच्या पत्नीला गुंतवणुकीच्या प्रवासात भागीदार बनवलं तर तुम्हाला अधिक फायदे मिळू शकतात. काही स्मार्ट मार्ग जाणून घेण्याचा प्रयत्न करू ज्यांचा अवलंब करून तुम्ही केवळ मोठा नफा मिळवू शकत नाही तर भरपूर कर देखील वाचवू शकता.

Post Office MIS

जर तुम्हाला दरमहा निश्चित उत्पन्न हवं असेल आणि एकरकमी रक्कम गुंतवायची असेल, तर पोस्ट ऑफिस मंथली इन्कम स्कीम (MIS) हा एक उत्तम पर्याय आहे. यामध्ये तुम्ही फक्त ९ लाख रुपयांपर्यंत जमा करू शकता, परंतु जर तुम्ही तुमच्या पत्नीसोबत संयुक्त खातं उघडलं तर ही मर्यादा १५ लाख रुपयांपर्यंत वाढते.

याचा अर्थ असा की तुम्ही अधिक पैसे जमा करून दरमहा अधिक व्याज मिळवू शकता. सध्या या योजनेवर ७.४% व्याज दिलं जात आहे. अशा परिस्थितीत, तुम्ही या योजनेतून दरमहा ९,२५० रुपये आणि वार्षिक १,११,००० रुपये कमवू शकता.

PPF मधून दुप्पट नफा

तुमच्या पत्नीच्या मदतीनं तुम्ही पीपीएफचा नफा दुप्पट करू शकता. कसं? हे जाणून घेऊ. सार्वजनिक भविष्य निर्वाह निधी (पीपीएफ) ही एक उत्कृष्ट दीर्घकालीन बचत योजना आहे जी कर वाचविण्यास देखील मदत करते. परंतु त्यात एक अट आहे की एखादी व्यक्ती फक्त एक पीपीएफ खाते उघडू शकते आणि त्यात दरवर्षी जास्तीत जास्त १.५ लाख रुपये जमा करू शकते. त्याच वेळी, त्यात संयुक्त खात्याचा पर्याय नाही.

परंतु जर पती-पत्नी दोघेही कमाई करत असतील तर ते त्यांच्या नावानं स्वतंत्र पीपीएफ खाते उघडू शकतात. अशा प्रकारे, दोघेही एकत्रितपणे वार्षिक ३ लाख रुपयांपर्यंत जमा करू शकतात आणि दोघांनाही त्यांच्या संबंधित गुंतवणुकीवर वेगळं व्याज मिळू शकतं. सध्या, या योजनेवर ७.१% व्याज दिलं जात आहे. याशिवाय, त्यावर कर लाभ देखील उपलब्ध आहे. ही योजना ई-ई-ई श्रेणी अंतर्गत येते, म्हणजेच गुंतवणूक, व्याज आणि मॅच्युरिटी, तिन्ही करमुक्त आहेत.

FD वर व्याजाची बचत

फिक्स्ड डिपॉझिट (FD) ही एक सुरक्षित गुंतवणूक मानली जाते, परंतु जर त्यावर मिळणारं व्याज वार्षिक ४०,००० रुपयांपेक्षा जास्त असेल तर TDS कापला जातो. येथे तुमची पत्नी तुम्हाला मदत करू शकते. जर तुमची पत्नी गृहिणी असेल किंवा तिचं उत्पन्न करपात्र नसेल, तर तुम्ही तिच्या नावावर FD करून TDS कपात टाळू शकता. यासाठी तिला फॉर्म १५जी भरावा लागेल. तुमच्या पत्नीला प्रथम धारक बनवून तुम्ही संयुक्त FD देखील करू शकता.

Home Loan मध्ये फायदा

घर खरेदी करणं हे प्रत्येकाचं स्वप्न असतं आणि गृहकर्ज ते प्रत्यक्षात साकारण्यास मदत करतं. जर तुम्ही तुमच्या पत्नीला गृहकर्जासाठी सह-अर्जदार बनवलं तर तुम्हाला अनेक फायदे मिळतात. सह-अर्जदार महिला असल्यास बँका अनेकदा व्याजदरात थोडीशी सूट देतात, ज्यामुळे तुमचा ईएमआय कमी होऊ शकतो. दुसरं म्हणजे, जर पती-पत्नी दोघंही कमावतात, तर तुम्ही संयुक्त कर्ज घेतल्यास जास्त कर्ज मिळण्याची शक्यता देखील वाढते

Home Loan वर कर बचत

संयुक्त गृहकर्जाचा सर्वात मोठा फायदा म्हणजे मोठी आयकर सूट. जर पती-पत्नी दोघांकडेही मालमत्ता असेल, तर दोघेही कलम ८०सी अंतर्गत गृहकर्जाच्या मुद्दलावर प्रत्येकी १.५ लाख रुपयांपर्यंत (एकूण ३ लाख रुपये) आणि कलम २४बी अंतर्गत व्याजावर प्रत्येकी २ लाख रुपयांपर्यंत (एकूण ४ लाख रुपये) वजावटीचा दावा करू शकतात. अशा प्रकारे, तुम्ही दोघेही मिळून एकूण ७ लाख रुपयांपर्यंत कर वाचवू शकता, जी एक मोठी बचत आहे. तथापि, हे तुमच्या गृहकर्जाच्या रकमेवर देखील अवलंबून असेल.