अक्षय्य तृतीयेच्या दिवशी सोने अचानक स्वस्त का झाले? २४ कॅरेट सोन्याचा १० ग्रॅमचा 'हा' आहे नवीन दर

Gold Rate Fall : अक्षय्य तृतीयेला सोने खरेदी करणे शुभ मानले जाते. आनंदाची बातमी अशी आहे की, प्रति १० ग्रॅम १ लाख रुपयांची पातळी ओलांडून इतिहास रचणारे सोने या सणाच्या दिवशी अचानक स्वस्त झाले आहे.

भारतीय आणि सोने यांचं एक अतुट नातं आहे. सोन्याच्या दागिन्यांशिवाय भारतीयांचा एकही सण पूर्ण होऊ शकत नाही. त्यामुळेच सोने खरेदीसाठीही आपल्याकडे मुहूर्त पाहिला जातो. याच साडेतीन मुहूर्तांपैकी अक्षय्य तृतीयेचा सण आज देशभरात साजरा केला जातो. या दिवशी खरेदी केलेल्या वस्तूंची किंमत वाढत राहते, अशी लोकांची भावना आहे. अशा परिस्थितीत अक्षय्य तृतीयेला सोने खरेदी करणे शुभ मानले जाते.

सोन्याच्या दरांबद्दल बोलायचे झाले तर, नुकतेच सोन्याच्या दराने १ लाख रुपयांचा टप्पा ओलांडला आहे. पण, दिलासा देणारी गोष्ट म्हणजे अक्षय्य तृतीयेच्या निमित्ताने सोन्याच्या किमती अचानक मोठ्या प्रमाणात घसरल्या आहेत.

सर्वप्रथम, सोन्याच्या आंतरराष्ट्रीय किमतींबद्दल बोलूया. अमेरिकेचे राष्ट्राध्यक्ष डोनाल्ड ट्रम्प यांच्या टॅरिफ घोषणेनंतर सोन्यात विक्रमी वाढ झाली होती. पण, आता अमेरिकेने टॅरिफमध्ये सवलत देण्याचे संकेत दिले आहेत. त्याचा परिणाम सोन्याच्या किमतीवरही दिसून आला असून ते स्वस्त झाले आहे.

कॉमेक्सवर सोन्याचा भाव प्रति औंस ३३०९ डॉलरच्या पातळीवर पोहोचला आहे. १ औंस म्हणजे २८ ग्रॅम सोने असते. गेल्या आठवड्यात ही किंमत प्रति औंस ३५०० डॉलरच्या जवळपास पोहोचली होती.

२२ एप्रिल रोजी, देशांतर्गत बाजारात जीएसटी + मेकिंग चार्जेससह सोन्याने प्रति १० ग्रॅम १ लाख रुपयांची पातळी ओलांडली. त्याच वेळी, मल्टी कमोडिटी एक्सचेंजवर, ५ जून रोजी एक्सपायरी असलेल्या सोन्याचा दर १ लाख रुपयांच्या अगदी जवळ पोहोचला होता.

पण जर आपण आजच्या अक्षय्य तृतीयेकडे पाहिले तर ते प्रति १० ग्रॅम सुमारे ४००० रुपयांनी घसरले आहे. हो, या काळात सोन्याची किंमत ९९,३५८ रुपयांवरून सुमारे ९५,००० रुपयांपर्यंत घसरली आहे.

आता देशांतर्गत बाजाराबद्दल बोलायचे झाले तर, इंडियन बुलियन ज्वेलर्स असोसिएशनच्या वेबसाइट IBJA.Com नुसार, मंगळवारी २४ कॅरेट १० ग्रॅम सोन्याची किंमत ९६,०१० रुपयांवर घसरली आहे.

जर आपण इतर गुणांच्या सोन्याच्या दराकडे पाहिले तर, २२ कॅरेट सोन्याचा १० ग्रॅम दर आता ९३,७१० रुपये आहे, तर २० कॅरेट सोन्याचा नवीन दर ८५,४५० रुपये प्रति १० ग्रॅम आहे. १८ कॅरेट सोन्याची किंमतही प्रति १० ग्रॅम ७७,७७० रुपयांवर घसरली आहे.