मालक असावा तर अस्सा! सगळीकडे कपात सुरू असताना कर्मचाऱ्यांना VCवर सुखद धक्का

कर्मचाऱ्यांच्या जीवावर कोट्यवधींची कमाई करणारे मालक खूप असतात. पण संकटाच्या काळात त्याच कर्मचाऱ्यांच्या पाठिशी उभ्या राहणाऱ्या मालकांची संख्या मात्र कमी असते.

कोरोनाच्या संकटात तर जवळपास सगळ्याच कंपन्यांनी वेतन कपात सुरू केली आहे. काहींनी तर कर्मचाऱ्यांची संख्यादेखील कमी करण्यास सुरुवात केली आहे.

अमेरिकेतला कोरोनाचा कहर पाहता बऱ्याच कंपन्या कर्मचारी कपात करण्याची शक्यता आहे. त्यामुळे लाखो लोकांवर बेरोजगारीची टांगती तलवार आहे.

कोरोनामुळे कंपन्यांना आर्थिक फटका बसत असताना एका मालकानं मात्र आपल्या कर्मचाऱ्यांना बोनस जाहीर केला आहे.

बाकीच्या कंपन्यांमध्ये कर्मचारी कपातीचे वारे वाहत असताना द कॉनर समूहाचे संस्थापक आणि मालक लॅरी कॉनर यांनी अवघ्या ८ दिवसांत शेअर बाजारात १२ कोटी रुपये (१.६ मिलियन अमेरिकन डॉलर) कमावले.

कोरोना संकटामुळे बाजारात निर्माण झालेल्या फायदा घेत लॅरी कॉनर यांनी १२ कोटींची कमाई केली.

यानंतर लॅरी कॉनर यांनी वर्क फ्रॉम होम करणाऱ्या कर्मचाऱ्यांशी व्हिडीओ कॉन्फरन्सच्या माध्यमातून संवाद साधला.

देशात कोरोनाचं मोठं संकट आणि याच पार्श्वभूमीवर सीईओंची व्हिडीओ कॉन्फरन्स यामुळे कर्मचारी चिंतेत होते.

कॉनर यांनी व्हिडीओ कॉन्फरन्समध्ये अपेक्षेप्रमाणे मोठी घोषणादेखील केली. मात्र ती कर्मचारी किंवा पगार कपातीची नव्हती. तर बोनसची होती.

सगळीकडून केवळ कपातीच्या घोषणा, चर्चा ऐकू येत असताना कॉनर यांनी शेअर बाजारातून कमावलेले १२ कोटी रुपये बोनस म्हणून जाहीर केले.

कोरोना संकटाच्या काळात कर्मचारी अतिशय तन्मयतेनं घरुन काम करत आहेत. त्यांच्या या कामाचा आपण आदर करतो, अशा भावना कॉनर यांनी बोनसची घोषणा करताना व्यक्त केल्या.

द कॉनर समूहात ४०० कर्मचारी काम करतात. ही कंपनी रिअल इस्टेट क्षेत्रात काम करते.