Gudi Padwa 2026 Date: गुढीपाडवा कधी? १८ की १९ मार्च? गुढी उभारण्याचा अचूक मुहूर्त एका क्लिकवर!
By ऑनलाइन लोकमत | Updated: March 12, 2026 21:35 IST2026-03-10T12:15:05+5:302026-03-12T21:35:49+5:30
Gudi Padwa 2026 Shubh Muhurat Tithi Time: हिंदू नूतन वर्षाचे स्वागत करण्यासाठी संपूर्ण महाराष्ट्र सज्ज होत आहे, (Marathi New Year 2026) मात्र यावर्षी 'गुढीपाडवा नेमका कधी?' आणि 'गुढी कोणत्या वेळी उभारावी?' याबाबत अनेकांमध्ये संभ्रम आहे. फाल्गुन अमावस्या(Falgun Amavasya 2026) आणि चैत्र प्रतिपदा अर्थात गुढी पाडवा(Gudi Padwa 2026) तिथींच्या एकत्र योगावर कालनिर्णय दिनदर्शिकेत स्पष्ट खुलासा केला आहे, तो जाणून घेऊ.
Marathi New Year 2026
मराठी नवीन वर्षाचा प्रारंभ म्हणजेच गुढीपाडवा. यावर्षी तिथींच्या क्षयामुळे तारखेबाबत थोडा गोंधळ निर्माण झाला आहे. चैत्र शुद्ध प्रतिपदा ही क्षय तिथी असली, तरी साडेतीन मुहूर्तांपैकी एक असल्यामुळे या दिवसाचे महत्त्व अजिबात कमी होत नाही.
गुढीपाडवा नक्की कधी?
यावर्षी गुढीपाडवा १९ मार्च २०२६, गुरुवार रोजी साजरा केला जाणार आहे. १८ मार्चला फाल्गुन अमावस्या असून तिची समाप्ती १९ मार्चच्या सकाळी होत आहे. त्यामुळे शास्त्रानुसार १९ मार्च हाच दिवस नूतन वर्षारंभासाठी योग्य ठरवण्यात आला आहे.
गुढी उभारण्याची सर्वात शुभ वेळ
१९ मार्च रोजी सकाळी चैत्र शुद्ध प्रतिपदेचा 'क्षय' आहे. याचा अर्थ असा की अमावस्या संपल्यानंतरच नवीन वर्षाची तिथी लागू होते. सकाळी ६ वाजून ५२ मिनिटांनी अमावस्या समाप्त होईल. त्यानंतर, अर्थात सकाळी ६ वाजून ५३ मिनिटांनंतर कधीही तुम्ही गुढी उभारू शकता.
इतर धार्मिक विधी आणि पूजन
केवळ गुढीच नाही, तर पाडव्यानिमित्त केले जाणारे इतर विधीही अमावस्या संपल्यानंतरच करावेत. जसे की, पंचांग पूजन व गणपती पूजन हेदेखील सकाळी ६:५३ नंतरच करावे. तसेच याच तिथीला श्रीराम नवरात्र व वासंतिक नवरात्र सुरु होते, त्यासंबंधित विधीदेखील ६:५३ नंतरच करावेत.
खरेदी आणि नवीन कामासाठी मुहूर्त
चैत्र शुद्ध प्रतिपदा ही तिथी 'क्षय' असली, तरी तो दिवस साडेतीन मुहूर्तांपैकी एक मानला जातो. त्यामुळे या दिवशी कोणतेही शुभ कार्य करण्यास हरकत नाही. सोने, नवीन जागा (Property), वाहन किंवा इलेक्ट्रॉनिक वस्तू खरेदी करण्यासाठी हा दिवस अत्यंत शुभ आहे. तसेच नवीन व्यवसायाचा शुभारंभ किंवा नवीन करारावर स्वाक्षरी करण्यासाठी हा दिवस निवडू शकता.
यापूर्वीही जुळून आला होता असा योग
अमावस्या समाप्तीनंतर गुढी पूजन करण्याची ही पहिलीच वेळ नाही. यापूर्वी १९ मार्च २००७, ६ एप्रिल २००८ आणि २८ मार्च २०१७ रोजीदेखील अशाच प्रकारे अमावस्या संपल्यानंतर गुढी उभारण्यात आली होती. त्यामुळे मनात कोणतीही शंका न ठेवता आनंदात नवीन वर्षाचे स्वागत करा.