५ कोटींच्या आमदार निधीतून कोविडसाठीची साहित्य खरेदी

राज्य शासनाच्या वतीने आमदार स्थानिक विकास कार्यक्रमांतर्गत प्रत्येक वर्षी एका आमदारांना मतदारसंघात विविध विकासकामे करण्यासाठी ४ कोटी रुपयांचा निधी देण्यात येतो. गेल्या वर्षीपासून राज्यावर कोरोनाचे संकट आल्याने आमदार निधी कोरोना प्रतिबंधात्मक उपाययोजनांसाठी खर्च करण्यास राज्य शासनाने मंजुरी दिली होती. यावर्षीही असाच निर्णय राज्य शासनाने घेतला आहे. त्यानुसार राज्यातील विधानसभा व विधान परिषदेतील आमदारांना प्रत्येकी १ कोटी रुपयांचा निधी २३ एप्रिल रोजी वितरित करण्याचे आदेश नियोजन विभागाच्या वतीने काढण्यात आले आहेत. त्यानुसार आ. डॉ. राहुल पाटील, आ. सुरेश वरपूडकर, आ. मेघना बोर्डीकर, आ. बाबाजानी दुर्राणी आणि आ. रत्नाकर गुट्टे या पाच आमदारांना प्रत्येकी १ कोटी रुपये वितरित करण्यात आले आहेत. या निधीतून आता कोविड उपाययोजनांसाठी लागणारी यंत्रसामुग्री व साहित्य खरेदी करण्याचे सूचित करण्यात आले आहे. त्यानुसार आमदारांना या निधीमधून शासकीय आरोग्य संस्थांसाठी ऑक्सिजन काॅन्सन्ट्रेटर्स, ऑक्सिजन सिलिंडर, रेग्युलेटर्स, हॉस्पिटल बेड्‌स, आयसीयू बेड्स, व्हायटलसाइन मॉनिटर्स, एनआयसीयू व्हेंटिलेटर्स, बायपॅप मशीन्स, स्ट्रेचर्स, पेशंट ट्रॉलीज, इमर्जन्सी ट्रॉलीज, फार्मासिटिकल फ्रिजेस, व्हॅक्सिन बॉक्सेस, कोरोना प्रतिबंधात्मक औषधी व यंत्रसामुग्री आदी साहित्य खरेदी करण्याचे सूचित करण्यात आले होते. याशिवाय आता ५ मे रोजी नियोजन विभागाने काढलेल्या आदेशात स्थानिक स्वराज्य संस्थांच्या रुग्णालयामध्ये ऑक्सिजन निर्मिती प्लांट व ऑक्सिजन साठवणूक टँक खरेदी करण्यासही परवानगी दिली आहे. त्यामुळे जिल्ह्यातील शासकीय आरोग्य संस्थांमध्ये येत्या काही दिवसांत आमदार निधीतून हे साहित्य उपलब्ध होण्याची शक्यता आहे.