विद्यार्थ्यांचा लाडका शिक्षक काळाच्या पडद्याआड! परभणीहून पुस्तके घेऊन येताना अपघाती मृत्यू

परभणीत अपघाताचे सत्र सुरूच; खासगी शाळेचे संस्थापक अध्यक्ष ज्ञानोबा कच्छवे यांचे रस्ते अपघातात निधन.

- लक्ष्मण कच्छवे
दैठणा (जि.परभणी) : परभणीहून गावाकडे परत येत असताना चारचाकी वाहनाच्या धडकेत खासगी शाळेचे संस्थापक अध्यक्ष व शिस्तप्रिय शिक्षक ज्ञानोबा सोपानराव कच्छवे यांचा दुर्दैवी मृत्यू झाला. ही घटना मंगळवारी रात्री ८ ते ९ वाजेच्या दरम्यान परभणी-गंगाखेड महामार्गावर तरोडा परिसरात घडली. यामुळे दैठणा गावावर शोककळा पसरली आहे.

पोलिसांकडून मिळालेल्या माहितीनुसार, शिक्षक ज्ञानोबा कच्छवे हे काही कामानिमित्त मंगळवारी स्वतःच्या दुचाकी (एमएच २२ एके ७०५०) वर सायंकाळी साडेसहा वाजता दैठणा येथून परभणीला गेले होते. तेथील काम आटोपून पुस्तके घेऊन रात्री ८:३० ते ९ वाजेच्या दरम्यान परत परभणी येथून दैठणा गावाकडे येत होते. दरम्यान, परभणी-गंगाखेड महामार्गावर तरोडा परिसरात एका बोलेरो वाहनाने त्यांच्या वाहनाला जोरदार धडक दिली. या अपघातात त्यांच्या डोक्याला गंभीर दुखापत झाली. अपघाताची माहिती मिळताच दैठणा येथील काही युवकांनी तातडीने त्यांना खासगी वाहनाने परभणीला उपचारासाठी दाखल केले. मात्र उपचारादरम्यान त्यांचा मृत्यू झाला.

मयत शिक्षक ज्ञानोबा कच्छवे यांच्या पश्चात पाच भाऊ, पुतणे-पुतण्या, पत्नी, एक मुलगा व दोन मुली असा मोठा परिवार आहे. ज्ञानोबा कच्छवे हे शिस्तप्रिय व विद्यार्थ्यांवर प्रेम करणारे शिक्षक म्हणून ओळखले जात होते. त्यांनी गावात अनेक विद्यार्थ्यांना घडवले असून सध्या देखील ते शिक्षण क्षेत्रात कार्यरत होते. त्यांच्या अकाली निधनामुळे आजी-माजी विद्यार्थी, ग्रामस्थांमध्ये हळहळ व्यक्त होत आहे.