येथील बालाजी नगर भागातील रमेश कोंडिबा जाधव याचा मृतदेह ५ मे रोजी सकाळी रक्ताच्या थारोळ्यात पडलेला आढळला होता. याप्रकरणी पोलिसांनी घटनास्थळी जाऊन पंचनामा केला. त्यानंतर या प्रकरणात ५ मे रोजी रात्री उशिरा मयताचे भाऊ बालाजी कोंडिबा जाधव यांनी कोतवाली पोलीस ठाण्यात तक्रार दिली. घरगुती कारणावरून रमेश कोंडिबा जाधव यांचा खून त्याचा मेव्हणा अविनाश सुदाम गायकवाड यांनी केल्याचे तक्रारीत म्हटले आहे. त्यावरून आरोपी अविनाश सुदाम गायकवाड यांच्या विरुद्ध खुनाचा गुन्हा दाखल करण्यात आला. घटनेनंतर आरोपी फरार झाला होता.
या प्रकरणात स्थानिक गुन्हा अन्वेषण शाखेच्या पथकातील कर्मचाऱ्यांच्या सहकार्याने पोलिसांनी बुधवारी रात्रीच आरोपी सुदाम गायकवाड यास अटक केली. गुन्हा नोंद झाल्यानंतर पाच तासातच आरोपीस अटक करण्यात आली. गुरुवारी आरोपी अविनाश गायकवाड यास न्यायालयासमोर उभे केले असता, न्यायालयाने १० मेपर्यंत पोलीस कोठडी सुनावली आहे. या प्रकरणाचा तपास सहायक पोलीस निरीक्षक विशाल बहात्तरे यांच्या मार्गदर्शनाखाली सहायक पोलीस निरीक्षक व्ही. एस. आरसेवार, कर्मचारी जी.आर. दुधाटे करीत आहेत.