परभणी : कोरोनापाठोपाठ जिल्ह्यातील ऑक्सिजनची मागणीही मोठ्या प्रमाणात घटली आहे. सध्या ७.६ के. एल. ऑक्सिजन लागत असून, जिल्ह्यात ३९ के. एल. ऑक्सिजनचा साठा आता उपलब्ध आहे.
कोरोना रुग्णांवर उपचार करण्यासाठी प्रशासनाने मोठ्या प्रमाणात खाटांची सुविधा उपलब्ध केली होती. कोविड रुग्णालयांमधून या रुग्णांवर उपचार करण्यात आले. विशेष म्हणजे, कोरोनाची गंभीर लक्षणे असलेल्या रुग्णांना ऑक्सिजन पुरवठा करावा लागत होता. एप्रिल आणि मे या दोन महिन्यांत जिल्ह्यात ऑक्सिजनवर असणाऱ्या रुग्णांची संख्या अधिक होती. त्यामुळे ऑक्सिजनचा तुटवडा निर्माण झाला होता. एप्रिल महिन्यात दररोज १४ के. एल. ऑक्सिजन जिल्ह्यासाठी लागत होता. मात्र त्या प्रमाणात ऑक्सिजन उपलब्ध होत नसल्याने प्रशासनाची मोठी धावपळ झाली होती.
कोरोनाचा संसर्ग आता मोठ्या प्रमाणात घेतला आहे. नवीन रुग्णांचे प्रमाण कमी झाले असून, कोरोना रुग्णालयातही रुग्णांअभावी खाटा रिक्त होत आहेत. उपलब्ध झालेल्या माहितीनुसार जिल्ह्यात सध्या शासकीय आणि खासगी रुग्णालयांत मिळून ३३४ रुग्णांना ऑक्सिजन दिला जात आहे. दररोज केवळ ७.६ किलोलिटर ऑक्सिजनची आवश्यकता भासत असून, त्या तुलनेत जिल्ह्यात २९.०३ के. एल. ऑक्सिजन साठा उपलब्ध आहे. या व्यतिरिक्त जम्बो सिलिंडर आणि ऑक्सिजन प्रकल्पांमधूनही मुबलक प्रमाणात ऑक्सिजन उपलब्ध होत आहे. त्यामुळे आरोग्य विभागातील अधिकारी, कर्मचाऱ्यांवर येणारा ताण बऱ्याच अंशी आता कमी झाला आहे.
३९ किलो ऑक्सिजन उपलब्ध
जिल्ह्यात पुरेशा प्रमाणात ऑक्सिजनच्या साठा करण्यात आला आहे. जिल्हा रुग्णालयातील ऑक्सिजन टँकमध्ये २० के. एल. आणि जिल्हा परिषदेच्या कोविड हॉस्पिटल आणि आयटीआय येथील कोरोना रुग्णालयात प्रत्येकी १० के. एल. अशी ५० के. एल. ऑक्सिजन साठवणुकीची क्षमता आहे. याशिवाय जिल्हा परिषदेच्या कोविड रुग्णालयात स्वतंत्र ऑक्सिजन प्रकल्प कार्यान्वित झाला आहे. प्रत्यक्षात ३९.०३ के. एल. ऑक्सिजन साठा सध्या उपलब्ध आहे. जिल्ह्यातील रुग्णांना दररोज किंवा ७.६ के. एल. ऑक्सिजनची आवश्यकता असून, याव्यतिरिक्त तीनही रुग्णालयांमध्ये उपलब्ध असलेल्या जम्बो सिलिंडरमध्ये ४१ लाख एक हजार लिटर ऑक्सिजन सध्या उपलब्ध आहे.
रुग्णांची संख्या घटल्याने दिलासा
कोरोनाबाधित रुग्णांची संख्या घटली असून, रुग्णालयात दाखल असलेल्या रुग्णांकडून ऑक्सिजनची मागणी कमी झाली आहे. त्यामुळे जिल्ह्यातील स्थिती समाधानकारक होत असल्याने दिलासा मिळत आहे.
ऑक्सिजनची स्थिती
उपलब्ध ऑक्सिजन - ३९.०३ के. एल.
ऑक्सिजनवरील एकूण रुग्ण - ३३४
जंबो सिलिंडरमधील ऑक्सिजन - ४१ लाख लिटर