सेलू : कमी भावात सोने देतो म्हणून मुंबई येथील एका डाॅक्टर महिलेला सेलू येथे बोलावून मारहाण करून ८ लाख रुपये लुटणाऱ्या मुख्य आरोपी महिलेसह ४ जणांना स्थानिक गुन्हे शाखा आणि सेलू पोलीसाच्या संयुक्त पथकाने रविवारी पहाटे सेलू तालुक्यातील जवळा जिवाजी व सोनपेठ तालुक्यातील शेळगाव येथून ताब्यात घेतले आहे. या आरोपींकडून ५ लाख ५ हजार रुपये हस्तगत केले आहेत. या किचकट गुन्हयाचा ४८ तासांत तपास लावण्यात पोलिसांना यश आले.
मुंबई येथील डाॅ. उज्ज्वला संदीप बोराडे यांना ३० हजार रुपये तोळा याप्रमाणे देतो, असे आरोपी महिलेने सांगितले होते. त्यामुळे डाॅ. उज्ज्वला या पती, काका यांना घेऊन सोने खरेदी करण्यासाठी शुक्रवारी सेलू येथे आल्या होत्या. मात्र आरोपी सुनिता आणि तिच्या सात साथीदारांनी डॉ.उज्ज्वला तसेच सोबत असलेले पती आणि काका यांंना काठ्यांनी बेदम मारहाण करून ८ लाख रुपये रोख आणि मोबाईल फोन असे ८ लाख २१ हजार रूपये लुटल्याची घटना घडली होती. याप्रकरणी सेलू पोलिसात सुनीता सह अज्ञात ८ आरोपी विरूध्द गुन्हा दाखल झाला होता.
स्थानिक गुन्हा शाखा आणि स्थानिक पोलिसांचे ४ पथके आरोपींच्या शोधात होते. पथक प्रमुख व्यंकटेश आलेवार आणि विजय रामोड यांनी माहिती घेतली तेव्हा स्थानिक आरोपींनी बाहेर जिल्ह्यातील आरोपींच्या मदतीने गुन्हा केल्याचे निष्पण झाले. खात्रीशीर माहिती झाल्यानंतर गुन्हे शाखेचे प्रभारी निरीक्षक व्यंकटेश आलेवार, सहाय्यक पोलीस निरीक्षक सरला गाडेकर यांच्या पथकाने सेलू तालुक्यातील जवळा जिवाजी येथे छापा टाकून मुख्य आरोपी सविता भोसले व मंजिरी सुखवास शिंदे या दोन्ही आरोपी महिलांना ताब्यात घेतले. त्यांच्याकडून ४ लाख ९० हजार रुपये हस्तगत केले. सेलू पथकाचे प्रमुख विजय रामोड, स्थागुशाखेचे पोलीस उपनिरीक्षक साईनाथ पुयड यांच्या पथकाने सोनपेठ तालुक्यातील शेळगाव येथून श्रीनाथ भोसले व शैलेश शिंदे यांना ताब्यात घेऊन १५ हजार रुपये हस्तगत केले. पथकाने ४ आरोपींना अटक करून रोख ५ लाख ५ हजार रुपये हस्तगत केले. पोलीस पथकात मधुकर चट्टे, शिवादास धुळगुंडे, दिलावर खान पठाण, सय्यद मोबीन, किशोर चव्हाण, हरिशचंद्र खुपसे, शेख अझहर, संतोष सानप, निळे, विलास सातपुते, रामेश्वर मुंडे, बाळू पुरणवाड, सायबर गणेश कौटकर, बालाजी रेड्डी, गौस खान पठाण यांचा समावेश होता.