"ज्या देशात मुलीला देवी म्हटलं जातं तिथं...", उर्मिला मातोंडकरचं कुस्तीपटूंना समर्थन, केलं भावनिक आवाहन

Wrestlers vs WFI : भारतीय कुस्ती महासंघाविरोधात दिग्गज खेळाडू पुन्हा एकदा धरणे आंदोलन करत आहेत.

brijbhushan singh news । नवी दिल्ली : भारतीय कुस्ती महासंघाविरोधात दिग्गज खेळाडू पुन्हा एकदा धरणे आंदोलन करत आहेत. कुस्ती महासंघाचे अध्यक्ष ब्रिजभूषण सिंह यांच्याविरूद्ध एफआयर दाखल करण्याची मागणी घेऊन पैलवानांनी सुप्रीम कोर्टात धाव घेतली होती. खरं तर आखाड्याबाहेरील कुस्ती अद्याप सुरू असून बॉलिवूड अभिनेत्री उर्मिला मांतोडकरने यात उडी घेत सरकारला एक भावनिक आवाहन केले आहे. 

या देशाची, सगळ्यांची मुलगी म्हणून मी आज तुमच्याशी बोलत आहे, अशा शब्दांत उर्मिला मांतोडकरने व्हिडीओच्या माध्यमातून या प्रश्नाकडे सर्वांचे लक्ष वेधले. ऑलिम्पिकमध्ये भारतासाठी पदक जिंकणाऱ्या मुली आजही आंदोलन करत आहेत. ज्या देशात मुलीला देवी म्हटले जाते तिथेच त्यांना न्यायाची भीक मागावी लागत आहे. महिला पैलवानांसोबत लैगिंक छळ होतोय, मुली आवाज उठवत असून उद्या दुसऱ्या मुलींसोबत अथवा दुसऱ्या क्षेत्रातील महिलांसोबत असे होईल. या मुलींना न्याय मिळायला उशीर झाल्यास वेळ निघून जाईल, अशा शब्दांत अभिनेत्रीने महिला पैलवानांची बाजू मांडली.

उर्मिला मातोंडकरचे कुस्तीपटूंना समर्थन 
"जेव्हा महिला खेळाडू पदक जिंकतात तेव्हा मंत्री त्यांच्यासोबत फोटो काढण्यासाठी झटतात, जेणेकरून तो फोटो ट्विटरवर टाकता यावा. मीडिया देखील छोट्या बातम्यांना महत्त्व देते पण इथे दुर्लक्ष करत आहेत. या मुलींना न्याय मिळायलाच हवा. देशाचे गृहमंत्री आणि क्रीडामंत्री यांनी आंदोलक पैलवानांना न्याय द्यायला हवा, नाहीतर 'बेटी बचाव'चा नारा देण्यात काही अर्थ नाही", असे उर्मिला मांतोडकरने अधिक म्हटले. 

In solidarity with our wrestlers ✊🏻✊🏻@HMOIndia@ianuragthakur@SakshiMalik@Phogat_Vinesh@BajrangPunia@aajtak@ndtv@ZeeNews@republic@zee24taasnews@abpmajhatv@ANI@News18Indiapic.twitter.com/Ppvd2OVzGk

— Urmila Matondkar (@UrmilaMatondkar) April 27, 2023

लक्षणीय बाब म्हणजे ऑलिम्पिकमधील कांस्य पदक विजेती साक्षी मलिक, बजरंग पुनिया आणि विनेश फोगाट यांसह देशातील ७ नामांकित पैलवानांनी रविवारी आंदोलनाचे हत्यार उपसले आहे. आज आंदोलनाचा पाचवा दिवस असून भारतीय कुस्ती महासंघाविरोधात दिग्गज खेळाडू जंतरमंतरवर धरणे आंदोलन करत आहेत.  प्रशिक्षक महिलांचा छळ करत आहेत आणि फेडरेशनचे काही जवळचे लोक प्रशिक्षक महिला प्रशिक्षकांशीही गैरवर्तन करतात. ते मुलींचा लैंगिक छळ करतात. भारतीय कुस्ती महासंघाच्या (WFI) अध्यक्षांनी अनेक मुलींचा लैंगिक छळ केला आहे, असे गंभीर आरोप महिला पैलवानांनी केले आहेत.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"