स्टीव्ह स्मिथकडे आॅस्ट्रेलियाचे नेतृत्व

जखमी मायकेल क्लार्कच्या भविष्याबाबत शंका व्यक्त केली जात असताना स्टीव्ह स्मिथ याला उर्वरित मालिकेसाठी आॅस्ट्रेलियाचा कर्णधार नेमण्यात आले आहे.

मेलबोर्न : जखमी मायकेल क्लार्कच्या भविष्याबाबत शंका व्यक्त केली जात असताना स्टीव्ह स्मिथ याला उर्वरित मालिकेसाठी आॅस्ट्रेलियाचा कर्णधार नेमण्यात आले आहे. सीएने सोमवारी या आशयाची घोषणा केली. अ‍ॅडिलेड कसोटीत स्नायू ताणले गेल्याने बाहेर पडलेल्या क्लार्कऐवजी स्मिथकडे नेतृत्व सोपविण्यात आले. ब्रॅड हॅडिन उपकर्णधार असेल. सीएचे निवडकर्ते रॉड मार्श यांनी स्टीव्हला आंतरराष्ट्रीय कसोटी कर्णधारपद मिळाल्याबद्दल अभिनंदन केले आहे.
मार्श पुढे म्हणाले, ‘निवडकर्ते स्मिथला पसंती दर्शवितात. त्याची कामगिरी, परिपक्वता आणि नेतृत्व क्षमता या कामात त्याच्यावर भरवसा दाखविता येतो. २५ वर्षांचा स्मिथ आॅस्ट्रेलियाचा सर्वांत युवा कर्णधार बनला. त्याआधी १९७९ साली किम ह्यूज हा २५ व्या वर्र्षी कसोटी संघाचा कर्णधार बनला होता. आॅस्ट्रेलियाचा तो ४५वा, तर एकंदरीत तिसरा युवा कर्णधार ठरला. स्मिथ याला याआधी स्थानिक क्रिकेट स्पर्धेत त्याने केवळ न्यू साऊथ वेल्सचे नेतृत्व केले आहे. तो भारताविरुद्ध ब्रिस्बेन कसोटीत नेतृत्व करेल. कर्णधारपदाच्या शर्यतीत स्मिथसोबत ३७ वर्षांचा ब्रॅड हॅडिन हा देखील दावेदार होता; पण अधिक वय असल्याने निवडकर्ऱ्यांनी त्याला उपकर्णधारपद बहाल केले.
अ‍ॅडिलेड सामना जिंकून आॅस्ट्रेलियाने चार सामन्यांच्या मालिकेत १-० अशी आघाडी घेतली.
या विजयात मोलाची भूमिका वठविणाऱ्या स्मिथने नेतृत्वाची संधी मिळाल्याबद्दल आनंद व्यक्त केला. तो म्हणाला, ‘अन्य सहकारी आणि हॅडिनकडून सहकार्य मिळेल अशी अपेक्षा आहे. गेली १८ महिने माझ्यासाठी आणि संघासाठी अत्यंत कठीण होते. कर्णधारपदाचे स्वप्न मी नेहमीच पाहिले. आता ही संधी मिळाली आहे. अनुभवी आणि युवा लोकांचे नेतृत्व करताना मला त्रास जाणवणार नाही. मी स्थानिक क्रिकेटमध्ये सर्वांसोबत खेळलो आहे. सध्याच्या संघातील अनुभवी खेळाडूंचे मला सहकार्य मिळेल, अशी आशा आहे.’ स्मिथने २०१० साली पाकविरुद्ध कसोटी पदार्पण केले. (वृत्तसंस्था)