Cristiano Ronaldo, Instagram: 'इन्स्टाग्राम'च्या मैदानात रोनाल्डोचा विक्रमी GOAL! गाठला ५०० मिलियन फॉलोअर्सचा टप्पा

इन्स्टाग्राम फॉलोअर्सच्या बाबतीत रोनाल्डोच्या स्पर्धेत दुसरा कोणीही नाही.

Cristiano Ronaldo, Instagram 500 Million Followers: जगातील सर्वोत्तम फुटबॉलपटूंमध्ये पोर्तुगालच्या ख्रिस्टियानो रोनाल्डोचे नाव निश्चितच घेतले जाते. जगातील महान फुटबॉलपटूंमध्ये त्यांची गणना होते. रोनाल्डो मैदानावर असताना विरोधी संघाला त्याचा कायम धाक वाटत राहतो. रोनाल्डोने फुटबॉलच्या जगात जितके नाव कमावले आहे, तितकेच तो सोशल मीडियावरही लोकप्रिय आहे. अलीकडेच, सोशल मीडियावर रोनाल्डोच्या नावावर आणखी एक मोठा विक्रम झाला आहे. सोशल मीडिया साइट इन्स्टाग्रामवर रोनाल्डोचे ५०० मिलियन फॉलोअर्स पूर्ण झाले आहेत. इतके फॉलोअर्स असलेला तो जगातील पहिला व्यक्ती आहे.

रोनाल्डोने इंस्टाग्रामवर ५०० मिलियन फॉलोअर्स म्हणजेच ५० कोटींचा टप्पा पार केला आहे. इंस्टाग्रामवर ५० कोटी फॉलोअर्स असलेला ख्रिस्टियानो रोनाल्डो हा जगातील पहिला क्रीडापटू ठरला आहे. इंस्टाग्रामशिवाय रोनाल्डोचे ट्विटवर १०.५ कोटी व फेसबूकवर १५.४ कोटी फॉलोअर्स आहेत. ख्रिस्टियानो रोनाल्डो इन्स्टाग्रामवरील एका पोस्टसाठी १९.७१ कोटी रूपये आकारतो. पण महत्त्वाची बाब म्हणजे, रोनाल्डो मात्र केवळ ५२३ लोकांनाच फॉलो करतो.

इंस्टाग्रामवर फॉलोअर्सच्या बाबतीत रोनाल्डोच्या स्पर्धेत दुसरा कोणीही नाही. फुटबॉल जगतात त्याचा कट्टर प्रतिस्पर्धी सजमला जाणारा अर्जेंटिनाचा लिओनेल मेस्सी त्याच्यापासून खूप दूर आहे. मेस्सीचे ३७६ दशलक्ष फॉलोअर्स आहेत. भारतीय क्रिकेट संघाचा सर्वोत्तम फलंदाज विराट कोहलीही या बाबतीत रोनाल्डो आणि मेस्सीनंतर तिसऱ्या क्रमांकावर आहे. कोहलीचे इंस्टाग्रामवर २२४ मिलियन फॉलोअर्स आहेत.

दरम्यान, रोनाल्डो आणि मेस्सी दोघेही सध्या फिफा विश्वचषक स्पर्धेत सहभागी झाले आहे. हा दोघांचाही हा शेवटचा वर्ल्ड कप असेल असे बोलले जात आहे.