कारच्या धडकेत महिलेचा मृत्यू, ४ जखमी

पनवेल तालुका पोलिसांनी कारचालकाविरोधात गुन्हा दाखल केला आहे.

नवीन पनवेल : कारला धडक दिल्याने दुसरी कार दुभाजकाला धडकून पलटी झाली. या भीषण अपघातात अस्फिया बानू मोहम्मद फरीद खान (२२) हिचा मृत्यू झाला, तर चार जण गंभीर जखमी झाले आहेत. या प्रकरणी पनवेल तालुका पोलिसांनी कारचालकाविरोधात गुन्हा दाखल केला आहे.

नूर आलम खान चालवत असलेल्या कारमध्ये चार प्रवासी बसले होते. मुंबई पुणे द्रुतगती महामार्गावरून ते लोणावळा येथे जात होते. नूर याने भरधाव कार चालवली आणि पुढे असलेल्या कारला धडक दिली. त्यामुळे ती कार सिमेंट ब्लॉकच्या दुभाजकाला धडकली आणि पलटी झाली. अपघातात कारमधील अस्फिया बानू मोहम्मद फरीद खान हिचा मृत्यू झाला, तर कारचालक नूर आलम खान, मोहम्मद अरबाज मोहम्मद अहमद, मोहम्मद अरिफ मोहम्मद अझम, रिजवान (सर्व रा. रायबरेली, उत्तर प्रदेश) जखमी झाल्याचे पोलिसांनी सांगितले.